დღეიდან, საქართველოს მთელ ტერიტორიაზე, მიმოქცევაში 100 ლარის ნომინალის განახლებული ბანკნოტები გამოვიდა. ახალი ბანკნოტები მიმოქცევაში ძველი ემისიების ბანკნოტებთან ერთად იქნება.

ეროვნულ ბანკის განმარტებით, 100 ლარის ნომინალის განახლებულ ბანკნოტზე შენარჩუნებულია ლარის ბანკნოტების თავდაპირველი თემატიკა, ამავდროულად ბანკნოტზე წარმოდგენილი ისტორიები გამრავალფეროვნებულია ცალკეული ახალი ელემენტებით. განახლებული დიზაინი კიდევ უფრო მეტი სიზუსტით და თანამედროვე იერსახით წარმოაჩენს საქართველოს მნიშვნელოვან კულტურულ-ისტორიულ მემკვიდრეობას.

"ლარის განახლებული ბანკნოტები დამზადებულია ისეთი მასალებისა და დამცავი მექანიზმების გამოყენებით, რომლებიც ზრდის მიმოქცევაში მათ მდგრადობას დაბინძურებისა და ბუნებრივი ცვეთისადმი. 100 ლარის ნომინალის განახლებული ბანკნოტები დაცულია მომხმარებლისათვის მარტივად აღქმადი და ამავე დროს, თანამედროვე და მაღალტექნოლოგიური პროცესის შედეგად მიღებული დამცავი ნიშნებით. მათ შორის დატანილია ნომინალის ამომცნობი ნიშანი სუსტი მხედველობის მქონე პირთათვის. აღსანიშნავია, რომ განახლებულმა ლარმა პირველი საერთაშორისო აღიარება უკვე მოიპოვა. 2016 წლის 15 მარტს, ბუქარესტში HSP Europe - ის კონფერენციაზე ორგანიზებულ დაჯილდოების ცერემონიალზე ევროპისა და დსთ–ს ქვეყნების მასშტაბით საუკეთესო რეგიონალური ბანკნოტის ნომინაციაში "2016 წლის საუკეთესო რეგიონალური ბანკნოტების სერია" ლარის განახლებული ბანკნოტების სერიამ გაიმარჯვა.

2017 წელს საფრანგეთის ქალაქ ბორდოში გაიმართება ღვინის საერთაშორისო გამოფენა,სადაც საქართველო მიწვეულია პირველ საპატიო სტუმრად და ამ ღონოსძიების მხარდაჭერის მიზნით ეროვნულმა ბანკმა მიიღო გადაწყვეტილება გამოუშვას 5 ლარიანი ვერცხლის საკოლექციო დანიშნულების მონეტა,რაც კიდევ ერთხელ ხელს შეუწყობს ქართული ღვინის კულტურის და ქვეყნის პოპულარიზაციას,მონეტის დიზაინზე გამოცხადდება კონკურსი და ყველა მსურველს შეეძლება მონაწილეობის მიღება", - განაცხადა ეროვნული ბანკის აღმასრულებელმა დირექტორმა, გიორგი მელაშვილმა.