იყო დეტალები რაზეც არ ვისაუბრე, რადგან კანონი მაძლევს ამის საშუალებას, - აღნიშნული განცხადება დაკითხვიდან გამოსულმა "რუსთავი 2"-ის გენერალურმა დირექტორმა, ნიკა გვარამიამ გააკეთა.    

„ვისაუბრე ყველაფერზე, რაც ჩემთვის ცნობილი იყო, გარდა იმ გარემოებებისა, რა ვითარებაში მოხდა ჩვენი შეხვედრა. იყო დეტალები რაზეც არ ვისაუბრე, რადგან კანონი მაძლევს ამის საშუალებას. იყო კითხვები 6 მილიონთან დაკავშირებითაც, სრულიად არაკორექტულია ამ შეკითხვების დასმა, ვინაიდან გამოძიება ეხება ინფორმაციის უკანონოდ მოპოვებას. მისი შინაარსი არ უნდა იყოს საინტერესო გამოძიებისთვის, მიუხედავად ამისა დავაკონკრეტე, რომ ეს საკითხი საერთოდ არ ეხებოდა ბატონ ახვლედიანს. საუბარი, რომელიც განთავსებულია ინტერნეტში არის ჩემი ჩაწერილი, არის ნამდვილად ჩემი ხმა, არის დამონტაჟებული იმგავარად, რომ ჩრდილი მიაყენოს ბატონ ახვლედიანს”, - განაცხადა ნიკა გვარამიამ.    

მისი თქმით, მამუკა ახვლედიანისთვის ქრთამის შეთავაზებაზე საუბარი არ ყოფილა.    

“რატომ უნდა შემეთავაზებინა ახვლედიანისთვის ქრთამი, ის „რუსთავის 2”-ის საკითხზე გადაწყვეტილებას არ იღებდა“, - განაცხადა  გვარამიამ.      

"რუსთავი 2"-ის გენერალური დირექტორის თქმით, გამოძიების იმედი არ აქვს.      

„შეუძლებელია ერთი ხელით ჩანაწერებს აკეთებდეს მეორე ხელით იძიებდეს", -აცხადებს გვარამია.    

იგი  ვარაუდობს, რომ შესაძლოა ჩანაწერი ”შიგნიდან იყოს გამოტანილი”.    

"არ გამოვრიცხავ, რომ საუბარი შიგნიდანაც  იყო გამოტანილი. სუს-ის აგენტურამ ჩემს კაბინეტში მოსასმენი აპარატურა ადრე უკვე დაამონტაჟა და ეს ხალხი ისევ სუს-შია დასაქმებული. არ გამოვრიცხავ, რომ საუბარი ჩემივე თანამშრომელს გამოეტანა, ყოველ შემთხვევაში შესაძლებლობა ამისი მაღალია”, - განაცხადა გვარამიამ.