ხარაგაულის მუნიციპალიტეტის სოფელ ზვარეში რკინიგზის ლიანდაგის მშენებლობაზე დასაქმებული მუშები საპროტესტო აქციას მართავენ. ისინი ამბობენ, რომ პროტესტს მანამდე განაგრძობენ, ვიდრე ჩინური კომპანიის ხელმძღვანელობა არ შეიცვლება.

სოფელ ზვარეში ჩინური კომპანია ლიანდაგის მშენებლობას ახორციელებს. გუშინ მშენებლობაზე დასაქმებულ ქართველ და ჩინელ მუშებს შორის ფიზიკური დაპირისპირება მოხდა, რა დროსაც რამდენიმე ქართველი მუშა, მათ შორის ზოგიერთი, სერიოზულად დაშავდა.

შინაგან საქმეთა სამინისტრომ ხარაგაულის მუნიციპალიტეტის სოფელ ზვარეში მომხდარ ინციდენტთან დაკავშირებით, ჩინეთის რესპუბლიკის სამი მოქალაქე დააკავა.

"შსს-ს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის თანამშრომლებმა, ჩატარებული ოპერატიულ-სამძებრო და საგამოძებო ღონისძიებების შედეგად, სხეულის განზრახ ნაკლებად მძიმე დაზიანების ბრალდებით, ჩინეთის სახალხო რესპუბლიკის სამი მოქალაქე: 1983 წ. დაბადებული ჭ. ლ., 1983 წელს დაბადებული ჩ.ჟ და 1984 წელს დაბადებული ჰ.ჩ დააკავეს.

გამოძიებამ დაადგინა, რომ აღნიშნულმა პირებმა მიმდინარე წლის 3 ნოემბერს, ურთიერთშელაპარაკების ნიადაგზე, საქართველოს 4 მოქალაქეს ბლაგვი საგნით სხეულზე სხვადასხვა სახის დაზიანება მიაყენეს. სამართალდამცველებმა სამივე ბრალდებული ცხელ კვალზე დააკავეს. გამოძიება ჯანმრთელობის განზრახ ნაკლებად მძიმე დაზიანების ფაქტზე მიმდინარეობს (საქართველოს სსკ-ს 118-ე მუხლით)", - აღნიშნულია შს სამინისტროს მიერ გავრცელებულ ინფორმაციაში.