დედოფალ ელისაბედის განკარგულებით, “ქართული ოცნების“ წევრს, სოფიკო ქაცარავას დიდი ბრიტანეთის იმპერიის საპატიო ორდენი (MBE) გადაეცა – ჯილდოს გადაცემის საზეიმო ცერემონიას, რომელიც ხუთშაბათ საღამოს დიდი ბრიტანეთის საელჩოში გაიმართა, საქართველოს პრემიერ-მინისტრი გიორგი კვირიკაშვილი დაესწრო. ამის შესახებ ინფორმაციას საქართველოს პრემიერ მინისტრის პრესსამსახური ავრცელებს.

დიდი ბრიტანეთის იმპერიის საპატიო ორდენი სოფიკო ქაცარავას დიდი ბრიტანეთის ელჩმა ჯასთინ მაქენზი სმიტმა გადასცა. მისი განმარტებით, სოფო ქაცარავას ჯილდო მიენიჭა იმ განსაკუთრებული საქმიანობისთვის, რომელიც მან დიდი ბრიტანეთის საელჩოში 11-წლიანი მოღვაწეობის დროს, საქართველოს და ბრიტანეთს შორის კავშირების განვითარებისა და საგანმანათლებლო ურთიერთობების გასაღრმავებლად გასწია.

დამსწრე საზოგადოებას სიტყვით მიმართა საქართველოს პრემიერ-მინისტრმა. გიორგი კვირიკაშვილმა „ქართული ოცნების“ წევრს დამსახურებული ჯილდო მიულოცა და მადლობა გადაუხადა ბრიტანეთის საელჩოს სოფიკო ქაცარავას საქმიანობის აღიარებისთვის.

„მინდა, მადლობა მოვახსენო ბრიტანეთის საელჩოს საქართველოსა და დიდ ბრიტანეთს შორის საგანმანათლებლო პარტნიორობისა და სტრატეგიული გაცვლების სფეროებში სოფიკოს საქმიანობის ამ მნიშვნელოვანი აღიარებისთვის. ამ საქმიანობას სოფიკო ახორციელებდა ბრიტანეთის საელჩოში მუშაობის 11 წლის განმავლობაში. მადლობას მოვახსენებ დიდი ბრიტანეთის ელჩებს, რომლებმაც დააფასეს სოფიკოს შრომა ამ შედეგების მისაღწევად, განსაკუთრებულ მადლობას ვუხდი ელჩს, ალექსანდრა ჰოლ ჰოლს, საქართველოს დიდ მეგობარს. ასევე მადლობას მოვახსენებ ბატონ ელჩს, ჯასთინ მაქენზი სმიტს ასეთი ბრწყინვალე ღონისძიების მასპინძლობისთვის. ჩემთვის ძალიან სასიხარულოა, რომ სოფიკო შეუერთდა ჩვენს გუნდს, რომლის ყველა წევრიც დარწმუნებულია, რომ მისი საქმიანობა პარლამენტში არანაკლებ ღირსშესანიშნავი იქნება. უკვე შემიძლია განვაცხადო, რომ სოფიკო პარტიაში მიმდინარე ბევრი სასიკეთო მოვლენის მამოძრავებელი ძალაა,” - განაცხადა პრემიერმა სიტყვით გამოსვლისას.

სოფიკო ქაცარავა საქართველოს რიგით მეორე მოქალაქეა, რომელსაც დიდი ბრიტანეთის იმპერიის საპატიო ორდენი გადაეცა.