„დემოკრატიული მოძრაობის“ თავმჯდომარემ, ნინო ბურჯანაძემ დღეს გამართულ პრესკონფერენციაზე საკონსტიტუციო ცვლილებებთან დაკავშირებით ისაუბრა და თქვა, რომ საქართველოს გადაქცევა საპარლამენტო რესპუბლიკად იქნება „პრაქტიკულად ქვეყნის დაქცევა“. მისი თქმით, ბევრ ევროპულ ქვეყანაში ეს მოდელი მუშაობს, მაგამ ამ ევროპულ მოდელებში“ არ არსებობს არაფორმალური მმართველობა, არ არსებობს ერთი ადამიანი, რომელიც არის პოლიტიკაში, რომელსაც საკუთარი ბიუჯეტი ქვეყნის ბიუჯეტზე მეტი აქვს“.

„ჩემი ღრმა რწმენით, და ეს ღრმა რწმენაც დაფუძნებულია რეალობაზე, რომელიც გვაქვს საქართველოში, ჩვენს ქვეყანაში უნდა შენარჩუნდეს საპრეზიდენტო ინსტიტუტი. დღეს ძალიან ბევრი საუბარია იმასთან დაკავშირებით, რომ საქართველო სრულყოფილად უნდა გადაიქცეს საპარლამენტო რესპუბლიკად. ეს იქნება ქვეყნის პრაქტიკულად დაქცევა და სახელმწიფოებრიობის გაუქმება. ამას ვამბობ სრული პასუხისმგებლობით“, - განაცხადა ნინო ბურჯანაძემ და დაამატა:

„ვიცი, შემომედავებიან ადამიანები, რომლებიც საპარლამენტო მოდელის მომხრეები არიან და იტყვიან, რომ ძალიან ბევრ ქვეყანაში ეს მოდელი წარმატებით მუშაობს. დიახ, ბევრ ევროპულ ქვეყანაში ეს მოდელი მუშაობს, მაგამ ამ ევროპულ მოდელებში არ არსებობს არაფორმალური მმართველობა. არ არსებობს ერთი ადამიანი, რომელიც არის პოლიტიკაში, რომელსაც საკუთარი ბიუჯეტი ქვეყნის ბიუჯეტზე მეტი აქვს, რომელიც მართავს მთავრობას, პარლამენტს, სასამართლოს, მათ შორის, საკონსტიტუციო სასამართლოს, მედიის ძალიან დიდ ნაწილს და რომელსაც უნდა ახლა საპრეზიდენტო ინსტიტუტიც ჯიბეში ჩაიდოს“, - განაცხადა ნინო ბურჯანაძემ.

მისივე თქმით, საპარლამენტო რესპუბლიკა მისაღებია მხოლოდ იმ სახელმწიფოებისთვის, სადაც ძლიერი დემოკრატიული ტრადიციები არსებობს. სადაც არსებობენ ძლიერი პოლიტიკური პარტიები, სადაც არ ხდება პოლიტიკური პარტიების ლიდერების დაშანტაჟება ან მოსყიდვა, სადაც პარტიები არ იშლებიან ხუხულასავით, არჩევნების წაგების გამო.