ბულგარეთის პრემიერ მინისტრმა, ბოიკო ბორისოვმა, მას შემდეგ რაც მისი პარტიის კანდიდატი საპრეზიდენტო არჩევნებში დამარცხდა, განაცხადა რომ იგი თანამდებობიდან გადადგება. ამის შესახებ BBC იტყობინება.

ბორისოვი მხარს უჭერდა პარლამენტის მემარჯვენე-ცენტრისტულ ლიდერს, ცეცკა ცაჩევას, რომელმაც ეგზით პოლების თანახმად, კვირას გამართულ არჩევნებში ხმების მხოლოდ 35 პროცენტი მიიღო.

პოლიტიკურმა აუტსაიდერმა, ბულგარეთის საჰაერო ძალების ყოფილმა მთავარსარდალმა რუმენ რადევმა ხმების 58%-ზე მეტი მიიღო და დამაჯერებლად გაიმარჯვა. მას მხარს უჭერდა ოპოზიციური „სოციალისტური პარტია“.

უფრო ადრე, კვირას, ბორისოვმა თქვა: „ჩვენ არანაირი გზით არ მივიღებთ მთავრობაში მონაწილეობას, თუკი წავაგებთ დღეს არჩევნებს“.

მას შემდეგ რაც ეგზით პოლებმა ოპოზიციის კანდიდატი აშკარა უპირატეს პოზიციაზე დაასახელეს, მან თქვა, რომ იგი შეასრულებს მის დაპირებას მომდევნო რამდენიმე დღეში.

„არჩევნებმა აშკარად აჩვენა, რომ მმართველ კოალიციას უკვე აღარ გააჩნია უმრავლესობა“, - განაცხადა მან.

„ჩვენ ვიღებთ ხალხის ნებას და ვულოცავთ მათ, ვისაც ამომრჩეველთა უმრავლესობის მხარდაჭერა გააჩნიათ“.

კოალიცია, რომელიც 2014 წლის არჩევნების დროს ბორისოვმა ჩამოაყალიბა, დამოკიდებული იყო მემარცხენე-ცენტრისტული და ნაციონალისტური პარტიების მხარდაჭერაზე.

პრეზიდენტად არჩეულმა რადევმა განაცხადა, რომ იგი შეინარჩუნებს ბულგარეთს ნატოში, მაგრამ დაადასტურა, რომ „ევროპელობა ანტი-რუსობას არ ნიშნავს“.

მისი ოპონენტი, ქალბატონი ცაჩევა მასზე უფრო პრო-ევროპელად იყო მიჩნეული და იგი ბულგარეთის წარსულს აღწერდა, როგორც საბჭოთა სატელიტის მდგომარეობაში მყოფი ქვეყნის „ბნელ წარსულს“.