თბილისის მერის, დავით ნარმანიას განცხადებით, 2017 წლის ბიუჯეტის პირველადი პროექტი საკრებულოში დადგენილ ვადაში გადაიგზავნება.

ნარმანიას თქმით, მომავალი წლის პრიორიტეტებად მუნიციპალური ტრანსპორტის განვითარება, საგზაო ინფრასტრუქტურა, გამწვანება და განათლება განისაზღვრა.

"მუნიციპალური ტრანსპორტის განვითარების მიმართულებით 2017 წელს 62 მლნ ლარზე მეტი დაიხარჯება, რაც გასულ წელთან შედარებით, თითქმის გაორმაგებული ოდენობის თანხაა.

ამასთან, საგზაო ინფრასტრუქტურის მშენებლობა, აღდგენა და მოვლა-შეკეთებისთვის 2017 წელს გასული წლის დამტკიცებულ ბიუჯეტთან (78,7 მლნ) შედარებით დედაქალაქის მერია 6.8 მლნ ლარზე მეტს დახარჯავს. (85,5 მლნ).

რაც შეეხება გამწვანებას, ამ მიმართულებითაც 2017 წლის ბიუჯეტი იზრდება 3 მლნ ლარზე მეტით.

განათლებასა და სკოლამდელი აღზრდის დაწესებულებების ხელშეწყობის ნაწილში კი წინა წლის დამტკიცებულ ბიუჯეტთან შედარებით 15 მლნ ლარზე მეტია ზრდა - დასრულდება 10 დაწყებული ბაღის მშენებლობა და დაიწყება 8 ახალი ბაღის მშენებლობის პროცესი", - განაცხადა დავით ნარმანიამ.