ბარაქ ობამამ გამაფრთხილებელი განცხადება გააკეთა „პრიმიტიული ნაციონალიზმის ზრდის“ გამო „ბრექსითის“ და შეერთებული შტატების საპრეზიდენტო არჩევნების შედეგებიდან გამომდინარე.

როგორც BBC იუწყება, მისი საბოლოო საზღვარგარეთული ტურნეს ფარლებში, საბერძნეთში საუბრისას ობამამ თქვა: „ჩვენ უნდა დავდგეთ წინააღმდეგ... ტომობრიობისა, რომელიც ჩვენ გარშემო იქმნება და გვყოფს ‘ჩვენიანებად’ და მათიანებად’.“

მან განაცხადა, რომ შეერთებულ შტატებს მტკივნეულად აქვს გაცნობიერებული დაყოფის საფრთხე „რასის, რელიგიურობის თუ ეთნიკურობის მხრივ“.

ობამამ ამ საკითხებზე საბერძნეთის პრემიერ მინისტრ ალექსის ციპრასთან დედაქალაქ ათენში გამართული შეხვედრის შემდეგ ისაუბრა. ობამა საბოლოო ტურნეს ფარგლებში ასევე გერმანიასა და პერუშიც ჩავა.

მან კიდევ ერთხელ თქვა, რომ იგი გაოცებული იყო ტრამპის გამარჯვებით.

ობამამ ასევე აღნიშნა, რომ დიდი ბრიტანეთის მიერ ევროკავშირიდან გასვლისთვის ხმის მიცემამ და შეერთებული შტატების არჩევნებმა აჩვენეს, რომ ადამიანები ახლა ზოგადად „ნაკლებად არიან გარკვეულნი მათ ეროვნულ იდენტობებში და იმაში, თუ რა ადგილი უკავიათ მსოფლიოში“ და ამან წამოშვა პოპულისტური მოძრაობები ორივე - მარცხენა თუ მარჯვენა მიმართულებით.