საქართველოს საგანგებო და სრულუფლებიანმა ელჩმა ამერიკის შეერთებულლ შტატებში დავით ბაქრაძემ, რომელიც დიპლომატის რანგში უფლებამოსილების შესრულებას ვაშინგტონში სავარაუდოდ, დეკემბრიდან შეუდეგბა, განაცხადა, რომ საქართველოს სასაპატრიარქოს წარმომადგენლებმა ბრიუსელში "მნიშვნელოვანი გზავნილი" მიიღეს და მათ მკაფიოდ განემარტათ, რომ "არის საკითხები, რომელსაც თითოეული სახელმწიფო საკუთრივ განსაზღვრავს, როგორი პოლიტიკა აირჩიოს".

მისი თქმით, ბოლო ორი წლის განმავლობაში საპატრიარქოსთან ერთად ორი პროექტი განხორციელდა, რომლის ფარგლებშიც მართლმადიდებლურ ეკლესიას მიეწოდა ინფორმაცია, თუ რას ნიშნავს საქართველოს ევროპული გზა.

„საქართველოს ევროპული გზა ნიშნავს, იმას, რომ ჩვენი კულტურით, ჩვენი ისტორიით, ჩვენი მრავალფეროვნებით უნდ გავხდეთ იმ მნიშვნელოვანი ოჯახის ნაწილი, რომლის სიმდიდრეც მრავალფეროვნებაშია. ვფიქრობ, რომ ბრიუსელში ძალიან სწორი ინფორმაციის გაცვლას ჰქონდა ადგილი. მათ მიიღეს ობიექტური ინფორმაცია იმასთან დაკავშირებით, რომ არის საკითხები, რომელზეც ჩვენ ვთანხმდებით, როგორც ევროპული საზოგადოება, მაგრამ არის საკითხები, რომელსაც თითოეული სახელმწიფო საკუთრივ განსაზღვრავს, როგორი პოლიტიკა აირჩიოს. საზოგადოება თავად ირჩევს. ამიტომ საქართველოს ევროპული გზა არ გამორიცხავს ამას და ეს იყო მნიშვნელოვანი გზავნილი, რომელიც საპატრიარქოს წარმომადგენლებმა მიიღეს”, - განაცხადა დავით ბაქრაძემ.

საქართველოს საპატრიარქომ ბრიუსელში ვიზიტის შესახებ სპეციალური განცხადება გაავრცელა და აღნიშნა, რომ ვიზიტი იყო გაცნობითი ხასიათის და მან მაღალ დონეზე ჩაიარა.

"ამასთან, აღმოჩნდა, რომ ნატოშიც და ევროსტრუქტურებშიც არასწორი ინფორმაცია ჰქონდათ საქართველოს ეკლესიის შესახებ და ჩვენც არასწორი წარმოდგენა გვქონდა მათ პოლიტიკასთან მიმართებაში რიგ თემებთან დაკავშირებით".