შეერთებული შტატების არჩეულმა პრეზიდენტმა დონალდ ტრამპმა ოთხშაბათს განაცხადა, რომ იგი არ ცდილობდა მისი შვილებისთვის „უსაფრთხოების ნებართვის“ მიღებას, რაც მათ კლასიფიცირებულ სამთავრობო ინფორმაციებზე წვდომის საშუალებას მისცემდა.

„მე არ ვცდილობ მივიღო ‘უმაღლესი დონის უსაფრთხოების ნებართვა’ ჩემი შვილებისთვის. ეს იყო ჩვეულებრივი, მცდარი ახალი ამბავი“, - თქვა უძრავი ქონების მაგნატმა „თვითერით“ გაკეთებულ განცხადებაში.

ტრამპმა აღნიშნული განცხადება მედიაში გაჟღერებული იმ ინფორმაციის საპასუხოდ გააკეთა, რომლის მიხედვითაც იგი ცდილობდა მისი სამი შვილისა და სიძისათვის ე.წ. უსაფრთხოების ნებართვის მიღებას. აღნიშნული სტატუსის მქონე პირს ამერიკის შეერთებულ შტატებში უფლება აქვს კლასიფიცირებულ, საიდუმლო ინფორმაციაზე გააჩნდეს წვდომა და ასევე, გულდასმითი შემოწმების შემდეგ, შეზღუდულ ადგილებში შევიდეს.

ამგვარი მოწმობების მოპოვება კი ნებას დართავდა ტრამპს ეროვნული უსაფრთხოების საკითხები მის ქალიშვილ ივანკასთან, ვაჟებთან, ერიკთან და დონალდ უმცროსთან, და სიძესთან, ჯერედ კუშნერთან ერთად განეხილა. ფედერალური კანონი უკრძალავს პრეზიდენტს ოჯახის წევრების მის ადმინისტრაციაში დასაქმებას.

ოთხივე მათაგანი მისი საარჩევნო კამპანიის დროს საკვანძო მრჩევლების თანამდებობებზე მუშაობდა.

ტრამპი ირწმუნება, რომ თავიდან აიცილებს ინტერესთა კონფლიქტს, რადგან მისი შვილები ბიზნეს სფეროში განაგრძობენ საქმიანობას, როგორც კი ის პრეზიდენტის უფლებამოსილების განხორციელებას შეუდგება.