მესტიის მუნიციპალიტეტში მიმდინარე წელს განსახორციელებელი პროექტების თითქმის 70% დასრულებულია - აცხადებს Guardian.ge-სთან საუბრისას მესტიის მუნიციპალიტეტის გამგებელი კაპიტონ ჟორჟოლიანი და იმედოვნებს, რომ წლის ბოლომდე პროექტების 85% შესრულდება, ერთ-ერთ ყველაზე მნიშვნელოვან პროექტად კი გამგებელი თეთნულდის სამთო-სათხილამურო კურორტის მშენებლობის დასრულებას მიიჩნევს, რის შემდეგაც მისი თქმით, დამატებითი შემოსავლები გაუჩნდება მუნიციპალიტეტს და განსაკუთრებით კი კურორტის მიმდებარე სოფლების მცხოვრებლებს.

კაპიტონ ჟორჟოლიანი ზამთარში, ზემო სვანეთში ქართველი და უცხოელი ტურისტების დიდ რაოდენობას ელოდება, რადგან მისი თქმით, მესტიის მუნიციპალტეტში ყველანაირი პირობაა შექმნილი ტურისტების კომფორტულად დასასვენებლად.

"მესტიაში სრულდება თეთნულდის მთაზე საბაგიროების მოწყობა. ამასთანავე, დასრულდა 26-კმ-იანი სამთო-სათხილამურო ტრასების მოწყობა. ეს ყველაფერი კი დეკემბრის შუა რიცხვებში, დაახლოებით, დეკემბრის 20-სკენ გაიხსნება და შევა ექსპლუატაციაში", - განუცხადა Guardian.ge-ს ჟორჟოლიანმა.

გამგებელი ამბობს, რომ მესტიის მუნიციპალიტეტში 2016 წლის ყველაზე მნიშვნელოვანი პროექტი, როგორც ფინანსურად, ისე მასშტაბებით და სახელმწიფოებრივი მნიშვნელობით, თეთნულდი იყო.

კაპიტონ ჟორჟოლიანი მიიჩნევს, რომ აღნიშნული პროექტის დასრულების შემდეგ დამატებითი შემოსავლის წყარო მიმდებარე თემების მცხოვრებლებსაც გაუჩნდებათ, რაც მიგრაციის პროცესის შეჩერების საწინდარიც იქნება.