საქართველოს პარლამენტის თავმჯდომარე ირაკლი კობახიძე, პარლამენტის თავმჯდომარის პირველი მოადგილე, საპარლამენტო კომიტეტების თავმჯდომარეები და უმრავლესობის ლიდერი აშშ-ის სახელმწიფო მდივნის თანაშემწის მოადგილეს, ბრიჯიტ ბრინკს და საქართველოში აშშ-ს საგანგებო და სრულფლებიან ელჩს, იან კელის შეხვდნენ.

ბრიჯიტ ბრინკმა ირაკლი კობახიძეს პარლამენტის თავმჯდომარედ არჩევა, „ქართულ ოცნებას“ კი არჩევნებში გამარჯვება მიულოცა და აღნიშნა, რომ ეს არის ძალიან დიდი შესაძლებლობა საქართველოს წინსვლისთვის.

„მე ვთქვი, რომ ჩვენი გადმოსახედიდან თანამშრომლობა, მათ შორის, ოპოზიციასთან და სტრატეგიული ეროვნული ინტერესების სფეროზე ფოკუსირება იქნება ჩვენი რეკომენდაცია, როდესაც ისინი თავიანთ საკანონმდებლო დღის წესრიგს შეუდგებიან“, - განაცხადა ბრიჯიტ ბრინკმა შეხვედრის შემდეგ.

მისივე თქმით, თუ დაგეგმილია საკონსტიტუციო რეფორმა ეს უნდა გაკეთდეს როგორც მთავრობის, პარლამენტისა და ოპოზიციის, ასევე ექსპერტების რაც შეიძლება მეტი ჩართულობით.

„მოხარული ვარ, ვთქვა, რომ პარლამენტის თავმჯდომარესთან და კომიტეტების ხელმძღვანელებთან საუბარში, მათ გამოხატეს მზაობა უზრუნველყონ ჩართულობა და საქმიანობის ისე წარმართვა, რაც ხელს შუწყობს ჩვენს საერთო ინტერესს საქართველოს ევროატლანტიკური ინტეგრაციის მიმართულებით“, - აღნიშნა აშშ-ის სახელმწიფო მდივნის თანაშემწის მოადგილემ.