მეამბოხეთა მიერ გახსნილმა საარტილერიო ცეცხლმა 8 ბავშვის სიცოცხლე შეიწირა ალეპოში, მთავრობის მიერ კონტროლირებად ტერიტორიაზე მდებარე სკოლაში, კვირას, და ე.წ. კასრის ბომბმა (მფრინავი იმპროვიზირებული ასაფეთქებელი მოწყობილობა) 6-სულიანი ოჯახი იმსხვერპლა აჯანყებულების მიერ დაკავებული ქალაქის ნაწილში, სადაც სამთავრობო ძალების მძიმე დაბომბვებმა მიწასთან გაასწორა საავადმყოფოები. ამის შესახებ „როიტერსი“ წერს.

სააგენტოს ცნობით, სამშაბათის შემდეგ ასეულობით ადამიანია მოკლული, სამთავრობო ძალებისა და მათი მოკავშირეების მიერ გააფთრებული იერიშებისა და მათდამი ალეპოს აღმოსავლეთ ნაწილში გამაგრებული ამბოხებულების მხრიდან გაწეული მტკიცე წინააღმდეგობისას.

ყველაზე მძიმე დაბომბვების შედეგად, რაც კი ამ დრომდე განხორციელებულა, ამბოხებულების მიერ კონტროლირებადი სირიული ქალაქი ალეპო ფაქტობრივად სამედიცინო ინფრასტრუქტურის და მომსახურების გარეშეა დარჩენილი. ამის შესახებ BBC იტყობინება.

მსოფლიო ჯანდაცვის ორგანიზაციამ განაცხადა, რომ სამთავრობო ძალების მიერ 5-დღიანი საჰაერო და საარტილერიო დარტყმების შემდეგ, ყველა დროებითი საავადმყოფო მწყობრიდან არის გამოსული.

სხვა ცნობების თანახმად, ზოგიერთი ამ საავადმყოფოებიდან მოქმედებაშია, მაგრამ ადამიანები ძალიან შეშინებული არიან და მათი გამოყენებისაგან თავს იკავებენ.

BBC-ის მიერ შაბათს გავრცელებული ინფორმაციის თანახმად, მიმდინარე კვირას ალეპოზე სამთავრობო იერიშების წამოწყების შემდეგ ათეულობით ადამიანია მოკლული.

შაბათს, ადამიანის უფლებების დაცვაზე მომუშავე დიდ ბრიტანეთში ბაზირებულმა სირიულმა ორგანიზაციამ განაცხადა, რომ ამბოხებულების მიერ კონტროლირებად ალეპოს ნაწილზე ახლანდელი სამთავრობო დარტყმების შედეგად სულ მცირე 27 სამოქალაქო პირია დაღუპული.

მედიკოსები ადრინდელი დარტყმების დროს ახერხებდნენ საველე პირობებში მოქმედი საავადმყოფოების კვლავ მოქმედებაში მოყვანას, მაგრამ ახლა მედიკამენტების და საჭირო მოწყობილობების მარაგების იმდენად დიდი ნაკლებობაა, რომ ეს უფრო რთული ხდება, წერს „როიტერსი“.

ახლანდელმა დაბომბვებმა ქუჩები უკაცრიელი გახადა, ადამიანები გარეთ გამოსვლას ერიდებიან და თავინთ სახლებს აფარებენ თავს.

„როიტერსი“ სირიაში მსოფლიო ჯანდაცვის ორგანიზაციის წარმომადგენლის, ელიზაბეტ ჰოფის სიტყვების ციტირებას ახდენს, რომლის თანახმადაც, არასამთავრობო ორგანიზაციებმა, რომლებიც თურქეთის საზღვარზე არიან ბაზირებული, „დაადასტურეს დღეს, რომ ყველა საავადმყოფო აღმოსავლეთ ალეპოში, მწყობრიდან არის გამოსული“.