"აუდიტორია 115"-ის წევრები თსუ-ის მე-6 კორპუსის პიკეტირებას განაგრძობენ, პარალელურად უნივერსიტეტში თვითმმართველობის არჩევნები იმართება.

"აუდიტორია 115"-ის სტუდენტები აანონსებენ, რომ 13:00 საათზე, არჩევნებს თსუ-ის პირველ კორპუსის ეზოში აქციით გააპროტესტებენ.

„ვიქნებით მაქსიმალურად რადიკალურები და პროტესტი იქნება მზარდი. პირველ საათზე გაიმართება აქცია პირველი კორპუსის ეზოში და მოვუწოდებ ყველა მოქალაქეს, მოვიდეს აქციაზე და დააფიქსიროს თავისი მოსაზრება,“ - აცხადებს "აუდიტორია 115"-ის წევრი გიორგი ჯავახაძე.

თვითმმართველობის არჩევნებში დელეგატობის ერთ-ერთი კანდიდატი, ალისა სულამანიძე აცხადებს, რომ "აუდიტორია 115" დღეს არჩევნების მიმდინარეობის პროცესში პროვოკაციებს გეგმავს.

"პირველ რიგში, ცესკო-ს მოვუწოდებ, რათა უზრუნველყოს ამ ადამიანების უსაფრთხოება და არჩევნების ჩატარება ისეთ პირობებში, სადაც არ ექნება ადგილი ექსცესებს. და რა თქმა უნდა, სამართალდამცავებს, თსუ-ის დაცვას, ადმინისტრაციას, რომელიც განთავსებულია მე-6 და მე-3 კორპუსებში, რომ აღკვეთოს მათ მიერ გამოყენებული ძალადობრივი მეთოდები", - აცხადებს ალისა სულამანიძე.

"აუდიტორია 115"-ის წევრებმა უნივერსიტეტის მე-6 კორპუსი გუშინ დაიკავეს.