ქობულეთის ქალთა ოთახში შეხვედრა გაიმართა, რომელიც პირუტყვის დაავადებების მონიტორინგისა და კატასტროფების რისკის შემცირების სამუშაო ჯგუფის შესაძლებლობების გაძლიერებას ისახავდა მიზნად.

როგორც Guardian.ge-ს ქობულეთის მუნიციპალიტეტიდან აცნობეს, შეხვედრაზე ადამიანისა და გარეული ცხოველების ურთიერთდამოკიდებულების სახელმძღვანელოს პრეზენტაცია გაიმართა.

მათი ინფორმაციით, სახელმძღვანელოს მიზანია, გააცნოს ადგილობრივი თვითმმართველობის წარმომადგენლებს, ფერმერებს და სოფლის მოსახლეობას გარეული ცხოველების თავდასხმების რისკების მართვის სახელმწიფო მარეგულირებელი ბაზა, პასუხისმგებელი სახელმწიფო სტრუქტურები და არსებული რეაგირების მექანიზმები. სახელმძღვანელო დოკუმენტი დაინტერესებულ მხარეებს დაეხმარება გარეული ცხოველების თავდასხმებისაგან დაცვის პრევენციული საქმიანობების დაგეგმვასა და განხორციელებაში, რომლებიც მოიცავს როგორც სტრუქტურულ, ისე არასტრუქტურულ ღონისძიებებს. დოკუმენტი ხელს შეუწყობს აჭარის ავტონომიურ რესპუბლიკაში შექმნილ კატასტროფების რისკის შემცირების მუნიციპალურ სამუშაო ჯგუფებს მაქსიმალურად ეფექტურად უზრონველყონ ადგილობრივ საჭიროებებზე რეაგირება საქართველოში მოქმედი საკანონმდებლო რეგულაციების ფარგლებში.

წარმოდგენილი სახელმძღვანელო დოკუმენტი მომზადებულია „შავი ზღვის ეკო აკადემიის“ ექსპერტთა მიერ და ეფუძნება მათ მიერვე 2015 წელს აჭარაში ჩატარებულ „ადამიანისა და გარეული ცხოველების საბაზისო კვლევას“. აღნიშნული კვლევა „შავი ზღვის ეკო აკადემიამ“ შვეიცარიის განვითარებისა და თანამშრომლობის სააგენტოს (SDC) მიერ დაფინანსებული და მერსი ქორფსის (Mercy Corps) მიერ იმპლემენტირებული „მცირე კავკასიის ალიანსების პროგრამის“ (ALCP) დაკვეთით მოამზადა.