საქართველოს პრეზიდენტმა, გიორგი მარგველაშვილმა საქართველოს პრემიერ მინისტრად გიორგი კვირიკაშვილის დანიშვნის შესახებ განკარგულება გამოსცა.

„საქართველოს კონსტიტუციის მე-80 მუხლის მე-8 პუნქტის შესაბამისად, საქართველოს პრემიერ-მინისტრად დაინიშნოს გიორგი კვირიკაშვილი“, - ნათქვამია საქართველოს პრეზიდენტის განკარგულებაში, რომელიც პრეზიდენტის ოფიციალურ ვებგვერდზეა გამოქვეყნებული. 

საქართველოს პარლამენტმა მთავრობის განახლებულ შემადგენლობას, რომელსაც გიორგი კვირიკაშვილი უხელმძღვანელებს, ნდობა გუშინ გვიან ღამით გამოუცხადა. პრემიერ მინისტრ კვირიკაშვილის მთავრობის დამტკიცებას 110-მა დეპუტატმა დაუჭირა მხარი, 19 კი წინააღმდეგი გამოვიდა.

პირველი ვიცე-პრემიერი, ეკონომიკისა და მდგრადი განვითარების მინისტრი გიორგი გახარია იქნება, ენერგეტიკის მინისტრი კახი კალაძე, საგარეო საქმეთა მინისტრი მიხეილ ჯანელიძე; შრომის, ჯანმრთელობისა და სოციალური დაცვის მინისტრი დავით სერგეენკო; ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი; განათლებისა და მეცნიერების მინისტრი ალექსანდრე ჯეჯელავა; სოფლის მეურნეობის მინისტრი ლევან დავითაშვილი; რეგიონული განვითარებისა და ინფრასტრუქტურის მინისტრი ზურაბ ალავიძე; ფინანსთა მინისტრი დიმიტრი ქუმსიშვილი; კულტურისა და ძეგლთა დაცვის მინისტრი მიხეილ გიორგაძე; სპორტისა და ახალგაზრდობის საქმთა მინისტრი ტარიელ ხეჩიკაშვილი; თავდაცვის მინისტრი ლევან იზორია; იუსტიციის მინისტრი თეა წულუკიანი; შინაგან საქმეთა მინისტრი გიორგი მღებრიშვილი; სასჯელაღსრულებისა და პრობაციის მინისტრი კახა კახიშვილი; გარემოსა და ბუნებრივი რესურსების დაცვის მინისტრი გიგლა აგულაშვილი; ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ვიქტორ დოლიძე; შერიგებისა და სამოქალაქო საკითხებში სახელმწიფო მინისტრი ქეთევან ციხელაშვილი.