იუსტიციის უმაღლესი საბჭოს მდივანი ლევან მურუსიძე უზენაესი სასამართლოს მოსამართლეებზე ზეწოლასთან დაკავშირებით, "რუსთავი 2"-ის გენერალური დირექტორის, ნიკა გვარამიას მიერ გაკეთებულ განცხადებას ცილისწამებას უწოდებს.

როგორც მან "რუსთავი 2"-თან საუბრისას აღნიშნა, მოსამართლეებზე ზეწოლა არ ხორციელდება.

„მიხეილ ჩინჩალაძეს მრავალი თვეების განმავლობაში არავითარი კონტაქტი არ ჰქონია ამ სამ მოსამართლესთან. თუ თქვენ გაქვთ წყარო, შეგიძლიათ გადაამოწმოთ, რომ ეს არის აბსურდი. რაც შეეხება ვანო ზარდიაშვილს, ეს არის აბსურდი. იმ სამ მოსამართლესაც შეგიძლიათ კითხოთ სახეზე თუ იცნობენ და ზოგადად რაიმე ურთიერთობა თუ აქვთ ზარდიაშვილთან. ყველაფერი ეს არის ცილისწამება. მე გადამოწმებული ინფორმაცია მაქვს თვითონ ჩინჩალაძესთან. მე მოსამართლეების განცხადება ვიცი, რომ მათზე არანაირი ზეწოლა არ ყოფილა. მე ვაცხადებ, რომ ეს არის მიზანმიმართული ცილისწამება. არავითარი ინფორმაცია არა მაქვს იმასთან დაკავშირებით, რომ იუსტიციის მინისტრი რომელიმე მოსამართლეზე ახდენდა ზეწოლას. “ - აცხადებს ლევან მურუსიძე.

საკუთრივ ხელისუფლებას აქვს მიღებული გადაწყვეტილება "რუსთავი 2"-ის წაღებასთან დაკავშირებით, - აღნიშნული განცხადება "რუსთავი 2"-ის გენერალურმა დირექტორმა, ნიკა გვარამიამ დღეს გამართულ საგანგებო ბრიფინგზე გააკეთა.

მისი თქმით, აღნიშნული გადაწყვეტილება მიღებული აქვს საქართველოს ყოფილ პრემიერ მინისტრს, ბიძინა ივანიშვილს და ხელისუფლების მაღალჩინოსნები მისი დავალებით ახორციელებენ სასამართლოზე ზეწოლას.

გვარამიას განცხადებით, სასამართლო აღნიშნულ ზეწოლას წინააღმდეგობას უწევს.

"ჩვენთვის ცნობილია ის გარემოება, რომ სასამართლოსთან რამდენიმე ადამიანი აწარმოებს "მოლაპარაკებას" და სინამდვილეში სასამართლოზე ზეწოლას. მათ შორის არის თეა წულუკიანი, შალვა თადუმაძე, მათ შორის არის ყოფილი პროკურორი ოთარ ფარცხალაძე და სასამართლოში ზონდერად ჩასმული მიხეილ ჩინჩალაძე", - განაცხადა გვარამიამ და დაამატა, რომ სამი დღის განმავლობაში - დღეს, ხვალ და ზეგ, სასამართლოზე უპრეცედენტო ზეწოლა იქნება.

მისი თქმით, ამ ზეწოლის მთავარ განმახორციელებლად არჩეულია"ბიძინა ივანიშვილის ახალი დავალებების შემსრულებელი, ზონდერი ივანე ზარდიაშვილი".