ხობი ფოთს უახლოესი გზით დაუკავშირდება - ხობი-ახალსოფელი-რკინიგზის სადგურის დამაკავშირებელი 10,5-კილომეტრიანი გზის მონაკვეთის სამშენებლო სამუშაოები მიმდინარეობს.

როგორც Guardian.ge-ს ხობის მუნიციპალიტეტის გამგებელმა, გოჩა ქაჯაიამ განუცხადა, პროექტი გარდამავალია და დაახლოებით, 8 თვეში, 2017 წელს დასრულდება.

"ეს არის ძალიან დიდი და მნიშვნელოვანი პროექტი მთლიანად მხარისთვის. პროექტი გარდამავალია და სავარაუდოდ, 8 თვეში უნდა დასრულდეს. ამ ეტაპზე გეტყვით, რომ ისეთ კარგ ტემპში ხორციელდება სამშენებლო სამუშაოები, რომ გეგმით გათვალისწინებულ დროსაც კი უსწრებენ", - განაცხადა ქოჩა ქაჯაიამ.

ხობის გამგებელთან ერთად, სამუშოების მიმდინარეობას სამეგრელო-ზემო სვანეთის გუბერნატორი ლევან შონია გაეცნო.

„ეს არის ძალიან მნიშვნელოვანი გზა, ეს არის უახლოესი გზა, რომელიც ხობს ფოთთან აკავშირებს. ახალი გზა ქალაქ ხობში მდინარე ხობის ხიდთან იწყება, გაივლის სოფელ მეორე გურიფულს, გაღმა პირველ ხორგას, ახალსოფელს და რკინიგზის სადგურთან მთავრდება. ახალი გზა თეკლათი-ჭალადიდი-ფოთის ავტომაგისტრალს უკავშირდება“ - განაცხადა ლევან შონიამ.

სამეგრელო-ზემო სვანეთის სამხარეო ადმინისტრაციის ცნობით, ახალი გზის მშენებლობისთვის 6 მილიონამდე ლარი იხარჯება. გზაზე ასფალტო-ბეტონის საფარის გარდა ეწყობა ხიდები, ტროტუარები, ეზოებში შესავლელები, სანიაღვრეები და სხვა საგზაო ინფრასტრუქტურა.

პროექტს მსოფლიო ბანკის დაფინანსებით ინფრასტრუქტურის სამინისტროს საავტომობილო გზების დეპარტამენტი ახორციელებს.