შეერთებული შტატების არჩეულმა პრეზიდენტმა დონალდ ტრამპმა ოჰაიოს შტატის ქალაქ ცინცინატში მის მხარდამჭერებთან შეხვედრისას კიდევ ერთხელ გაილაშქრა „არაკეთილსინდისიერი მედიის“ წინააღმდეგ და გამოხატა თავისი უკმაყოფილება, რომ არჩევნების დღეს სატელევიზიო არხებმა მისი გამარჯვება პენსილვანიაში, შუაღამემდე არ გამოაცხადეს.

როგორც ბრიტანული „გარდიანი“ წერს, ტრამპმა სიამაყით ახსენა მისი საარჩევნო კოლეგიაში გამარჯვება, მაგრამ არა პირდაპირი გზით ხმის მიცემა, ე.წ. პოპულარული კენჭისყრა: „ჩვენ გავიმარჯვეთ დიდი უპირატესობით. ჩვენ არ გვყავდა პრესა, პრესა იყო სასტიკი“.

ტრამპმა შეკრებაზე სიტყვით გამოსვლა „გლობალიზმზე“ თავდასხმით დაიწყო.

„არ არსებობს გლობალური ჰიმნი, გლობალური ვალუტა“, - თქვა მან. „ჩვენ ერთი დროშის ერთგულების წინაშე ვდებთ აღთქმას, და ეს დროშა არის ამერიკული დროშა“. ტრამპმა დაამატა: „მსოფლიო დიდებულია, მაგრამ ახლა ჩვენ გვინდა ფოკუსირება მოვახდინოთ ჩვენ ეროვნულ საზოგადოებაზე“.

არჩეულმა პრეზიდენტმა ასევე ტეორისტული თავდასხმების განხორციელების მიზეზად შეერთებულ შტატებში ლტოლვილების მიღება დაასახელა. „ეს არის საფრთხეები, რომელიც სულელურად შეიქმნა ჩვენი სულელი პოლიტიკოსების ლტოლვილთა პროგრამებით“, - განაცხადა ტრამპმა.