საქართველოს პარლამენტის თავმჯდომარე ირაკლი კობახიძე „რუსთავი 2“ - ის სასამართლოში მიმდინარე პროცესთან დაკავაშირებით მორიგ კომენტარს აკეთებს და პირობას დებს, რომ დღევანდელი ხელისუფლების პირობებში „მოვლენების ნებისმიერი სცენარით განვითარების“ მიუხედავად ქვეყანაში, როგორც „მედიის პლურალიზმი, ისე მედიის თავისუფლება“, უზრუნველყოფილი იქნება.

„ჩვენ ყველაფერს გავაკეთებთ იმისათვის, რომ მოვლენების ნებისმიერი სცენარით განვითარების პირობებში საქართველოში იყოს უზრუნველყოფილი, როგორც მედიის პლურალიზმი, ისე მედიის თავისუფლება. გახსოვთ თქვენ, რა მდგომარეობა გვქონდა ჩვენ 2012 წლამდე ამ კუთხით. სამივე ნაციონალური ტლეარხი იყო „ნაციონალური მოძრაობის“ მონოპოლიის ქვეშ და დღეს გვაქვს რადიკალურად განსხვავებული სიტუაცია. ეს არის ჩვენი მიღწევა, მედია პლურალიზმი არ არსებობდა საქართველოში და ჩვენი ხელისუფლების პირობებში დამყარდა და ეს არის ის მიღწევა, რომელსაც ჩვენ განსაკუთრებით ვუფრთხილდებით... იყო კითხვა დასმული (კობახიძე სავარაუდოდ, „რუსთავი 2“ -ის ჟურნალისტის მიერ ვაშინგტონში, აშშ-ის სახელმწიფო დეპარტამენტის ოფიციალური წარმომადგენლის ჯონ კირბისადმი დასმულ შეკითხვასა და გაცემულ პასუხზე საუბრობს), გაეცა ძალიან სწორი პასუხი ამ კითხვას და ამ სულისკვეთებას ჩვენ თავიდან ბოლომდე ვიზიარებთ“, - განაცხადა ირაკლი კობახიძემ „რუსთავი 2“-თან საუბრისას.