გოგლა ჟვანია მისი ძმის, ზურაბ ჟვანიას საქმის სამედიცინო ექსპერტის, ლევან ჩაჩუას მიმართ არსებული გამამართლებელი განაჩენის უზენაესი სასამართლოს მიერ ძალაში დატოვებას ეხმაურება.    

როგორც გოგლა ჟვანიამ განაცხადა, სამედიცინო ექსპერტის გამართლება ზურაბ ჟვანიასა და რაულ უსუპოვის გარდაცვალების გარემოებებს არ ცვლის.    

"ჩაჩუას დასკვნაში უწერია, რომ თავის ქალა არის სუფთა. ამ დროს, ამ დოკუმენტებში აშკარად ჩანს, რომ როგორც მინიმუმ, სუფთა არ არის. სიტყვა სუფთა არ უნდა დაეწერა. რატომ ვერ მოხდა ამ მტკიცებულებების გაზიარება სასამართლოს მიერ, მე ვერ გეტყვით, მე ჩაჩუას პროცესს არასდროს არ დავსწრებივარ. ეს არ არის ჩემთვის პრიორიტეტი იმიტომ, რომ ჩაჩუა გამართლდებოდა თუ გამტყუნდებოდა, ამით არ იცვლება ზურაბ ჟვანიასა და რაულ უსუპოვის გარდაცვალების გარემოებები. ჩაჩუა ჩაერთო საქმეში მხოლოდ და მხოლოდ მას შემდეგ, როდესაც აღარც ზურა იყო ცოცხალი და აღარ უსუპოვი. ის გამოიჩენდა თუ არა გულგრილობას თავისი ექსპერტიზის დროს, ამით არაფერი არ იცვლება", - განაცხადა გოგლა ჟვანიამ.    

ზურაბ ჟვანიას საქმის ექსპერტის, ლევან ჩაჩუას მიმართ, თბილისის სააპელაციო სასამართლოს მიერ გამოტანილი გამამართლებელი განაჩენი უზენაესმა სასამართლომ ძალაში დატოვა.    

ლევან ჩაჩუა 2014 წლის 21 მარტს დააკავეს და ბრალი სისხლის სამართლის კოდექსის 342-ე მუხლის 1-ლი ნაწილით წაუყენეს.    

გამოძიების ინფორმაციით, 2005 წლის 3 თებერვალს ლევან ჩაჩუამ ყოფილი პრემიერ მინისტრის, ზურაბ ჟვანიასა და რაულ უსუპოვის გარდაცვალების საქმეზე, სასამართლო-სამედიცინო ექსპერტიზის ჩატარების დროს, გვამების გამოკვლევისას გამოიჩინა გულგრილობა და არაჯეროვნად შეასრულა სამსახურებრივი მოვალეობა.    

პროკურატურის მოთხოვნის საფუძველზე, ლევან ჩაჩუას თბილისის საქალაქო სასამართლომ აღკვეთის ღონისძიების სახით წინასწარი პატიმრობა შეუფარდა, თუმცა, ის 8 თვის შემდეგ გირაოს სანაცვლოდ გაათავისუფლეს.    

2015 წლის 16 მარტს თბილისის საქალაქო სასამართლომ ლევან ჩაჩუა გაამართლა. სასამართლო გადაწყვეტილება, საქართველოს მთავარმა პროკურატურამ სააპელაციო ინსტანციაში გაასაჩივრა, თუმცა, სააპელაციო სასამართლომ გამამართლებელი განაჩენი ძალაში დატოვა.