საქართველოს პრემიერ მინისტრი გიორგი კვირიკაშვილი ვიზა-ლიბერალიზაციის ე.წ. შეჩერების მექანიზმის შესახებ შეთანხმების მიღწევას ეხმაურება და ევროპარლამენტში “ევროპის სახალხო პარტიის” ჯგუფის თავმჯდომარეს მანფრედ ვებერს, ევროკომისარს იოჰანეს ჰანს, ევროკავშირის საბჭოს პრეზიდენტს, დონალდ ტუსკსა და ევროპარლამენტის პრეიზდენტს, მარტინ შულცს ვიზა-ლიბერალიზაციის პროცესის მხარდაჭერისთვის მადლობას უხდის.

„გასულ კვირას კარგი შეხვედრის შემდეგ, კიდევ ერთხელ მადლობას გიხდით საქართველოს ვიზა-ლიბერალიზაციაზე გაწეული ჩინებული სამუშაოსთვის. ჩვენ ახლა ყველანი ველოდებით სწრაფ დამტკიცებას“, - წერს გიორგი კვირიკაშვილი „თვითერზე“ ინგლისურად.

საქართველოს პრემიერის აღნიშნულ განცხადებას ევროკავშირის საბჭოს პრეზიდენტი დონალდ ტუსკი გამოეხმაურა: "ვიზის შეჩერების მექანიზმზე დებატები დასრულებულია. ახლა კი საბოლოო ნაბიჯია გადასადგმელი უკრაინისა და საქართველოსთვის უვიზო მიმოსვლის მისანიჭებლად", - დაწერა ტუსკმა "თვითერზე".

გიორგი კვირიკაშვილის განცხადებას გამოეხმაურა ევროკომისარი იოჰანეს ჰანი, რომელიც წერს: "ბედნიერი ვარ, რომ ჩვენი დაუღალავი შრომის საფასურს ვხედავთ. ევროკავშირმა ახლა დაუყოვნებლივ უნდა მიანიჭოს საკმაოდ დამსახურებულად უვიზო მიმოსვლა საქართველოსა და უკრაინის მოქალაქეებს".

საქართველოს პრემიერ მინისტრი ევროპის მაღალჩინოსნების კომენტარებს პასუხობს, კიდევ ერთხელ მადლობას უხდის მათ გაწეული ვეებერთელა სამუშაოსთვის და აცხადებს, რომ ქართველი ხალხი ახლა ვიზა-ლიბერალიზაციის სწრაფად მიღებას მოუთმენად ელოდება.