სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე მრევლს საახალწლოდ სახლში ნაძვის ნერგის შეტანას ურჩევს და ამავე დროს მოუწოდებს ყველას, რომ ნერგების გამოყვანა შეისწავლონ. პატრიარქმა ამის შესახებ საკვირაო ქადაგებისას ისაუბრა.

„მოდის ახალი წელი. ხშირ შემთხვევაში, სახლებში შეაქვთ მკვდარი ნაძვის ხე. სასურველია, რომ შეიტანოთ ნაძვის ნერგი”, - ბრძანა პატრიარქმა.

როგორც მან დღევანდელ ქადაგებაზე განაცხადა, საპატრიარქოს დაქვემდებარების ქვეშ უკვე 10 წელია არსებობს კოლეჯი და ნერგების გამოყვანის შესწავლის მსურველებს შეუძლიათ მიმართონ აღნიშნულ კოლეჯს.

„ადამიანი ურთულესი ქმნილებაა ღვთის. ადამიანი არის ხატება ღვთის. ბევრ საკითხს ადამიანის გონება წვდება, მაგრამ არის ისეთი საკითხები, რომელსაც ვერ წვდება. მაგალითად, რა არის სიცოცხლე. მაგალითად, ავიღოთ მცენარე. შესაძლოა, ადამიანმა შექმნას მსგავსი თესლი, თუმცა ის თესლი იქნება მკვდარი, არავითარი სიცოცხლე მასში არ იქნება, თუმცა თუ ღვთისგან ჩადებელი სიცოცხლეა მასში, იზრდება და მრავლდება. მცენარეები, რომლებიც შეაქვთ სახლში, ტაძრებში, თუ მოჭრილია, ის მომაკვდავია. თუ სიცოცხლეა მასში, თუ ფესვის სისტემაა მასში, ის ცოცხალია და სიცოცხლე შეაქვს ადამიანის საცხოვრებელში. 10 წლის წინ გაიხსნა გამწვანების კოლეჯი საქართველოს საპატრიარქოში, სამების ტერიტორიაზე, რომელსაც ხელმძღვანელობენ ზურაბ შევარდნაძე და დედა თეკლე. ამ 10 წლის განმავლობაში ბევრი რამ გაკეთდა და მინდა დავლოცო მათი შემოქმედება. მოგიწოდებთ ყველას, რომ ნერგების გამოყვანა შეისწავლოთ”, - ბრძანა პატრიარქმა და დაამატა, რომ უცხოეთშიც გააქვთ თესლი საქართველოდან და ხდება მისი იქ გავრცელება.

„მაგალითად, სოჭის ხე, რომლითაც მდიდარია რაჭა - საქართველოდან გააქვთ მისი თესლი და შემდეგ იზრდება სხვადასხვა ქვეყანაში. განსაკუთრებით გამოირჩევა დანია”, - აღნიშნა ილია მეორემ.