ჭიათურის მუნიციპალიტეტში დიდთოვლობამ პრობლემები შექმნა. ამ დრომდე მუნიციპალიტეტის მასშტაბით, 6 000 აბონენტს ელექტროენერგია არ მიეწოდება. როგორც Guardian.ge-ს ჭიათურის გამგებელმა, ზურაბ კუპატაძემ განუცხადა, უხვი ნალექის შედეგად შექმნილი პრობლემების აღმოსაფხვრელად, 24-საათიან რეჟიმში უწევთ მუშაობა. ელექტრომომარაგების აღდგენის მიზნით, სამუშაოდ გასულია 14 ჯგუფი, მობილიზებულია სპეცტექნიკა და მიმდინარეობს თოვლისგან გაწმენდითი სამუშოები. ზურაბ კუპატაძე ვარაუდობს, რომ ამ დროისთვის არსებული ყველა პრობლემა საღამოსთვის გადაჭრილი იქნება.

(ჭიათურის მუნიციპალიტეტის გამგებელი ზურაბ კუპატაძე, დუშეთი, 8 დეკემბერი, 2016)

„ერთ კვირაზე მეტია, რაც ჭიათურის მუნიციპალიტეტში ინტენსიურად თოვს. ფაქტობრივად, 24-საათიან რეჟიმში ვმუშაობთ. ჩვენ გვაქვს ქალაქის 18 დიდი უბანი და 60 სოფელი 400-მდე უბნით. რამდენჯერმე მოხდა ამ ადგილების თოვლისაგან გაწმენდა. ამ დილით გვქონდა შტაბის სხდომა და დავგეგმეთ, რომ კიდევ ერთხელ მომხდარიყო გაწმენდა. არ ვართ მაინცდამაინც განებივრებული ტექნიკით, თუმცა, რაც ჩვენს მფლობელობაშია, ყველაფერს ვიყენებთ.

6 000 აბონენტს ამ დროისთვის ელექტროენერგია არ მიეწოდება. მივიღეთ შესაბამისი ზომები - 8 ადგილობრივი ჯგუფი და დამატებით 6 ხაშურიდან, ჯამში 14 ჯგუფი გასულია, რათა აღადგინონ ენერგომომარაგება. ვფიქრობ, რომ საღამოსთვის შევძლებთ ამ 6 000 აბონენეტს ელექტროენერგია აღვუდგინოთ.

ჭიათურის მუნიციპალიტეტის 60 სოფელი 15 ადმინისტრაციულ ერთეულშია განაწილებული. ქვაციხის ადმინისტრაციულ ერთეულში გაგზავნილია ტექნიკა და იქაურობა გაიწმინდა თოვლისაგან. კაცხის ადმინისტრაციულ ერთეულში დარჩენილია რამდენიმე სოფელი. ვაჭევის ადმინისტრაციულ ერთეულის 4 სოფელში კი ცოტა ხანში დასრულდება გაწმენდითი სამუშაოები. ტრაქტორი ამ წუთებში სამუშაოდ გავიდა რგანი-ხრეითის მიმართულებით. ხვაშითის ადმინისტრაციულ ერთეულში არ არის მოასფალტებული სოფლები, აქაც უკვე სავარაუდოდ, დაიწყებოდა მუშობა. ზოდის მიმართულებითაც მიმდინარეობს სამუშაოები. ითხვისში, ბეგიაურსა და ბჟინევში დასრულდა თოვლისაგან გაწმენდითი სამუშაოები, დღეს კიდევ ერთხელ. მანდაეთის მიმართულებით სამი სოფელი არის ახლა ჩაკეტილი და ტრაქტორი ცოტა ხანში შევა იქაც, ეს სოფლებია მეჩხეთური, ჩხილაური, ქბილარი. ამ სოფლებში თოვლის საფარმა 1 მეტრს გადააჭარბა. მათ არც ელეტრქოენერგია არ მიეწოდებათ. ნიგოზეთის ადმინისტრაციულ ერთეულში, სადაც 9 სოფელი შედის, ორი ტრაქტორი მუშაობს და გაწმენდილია ტერიტორია. გეზრულის მიმართულებით სააგზაო დეპარტმანეტს უნდა ემუშავა, თუმცა, დღეს არ იყო გაწმენდილი გზა და ცოტა მკაცრი საუბარი მომიწია მათთან. ამ ეტაპზე მოიყვანეს მათ უკვე ტრაქტორი და მიმდინარეობს გაკვალვა სვერი-თვალუეთი-პერევისის მიმართულებით. მე ვფიქრობ, რომ საღამოსთვის მოვახერხებთ მთლიანად იყოს ყველა ადგილი თოვლისაგან გაწმენდილი და აღდგენილი იყოს ელექტროენერგია. წყალმომარაგების კუთხითაც გვქონდა პრობლემა - ნაგუთის დასახლებას ამ დრომდე არ მიეწოდება წყალი", - განუცხადა Guardian.ge-ს ჭიათურის მუნიციპალიტეტის გამგებელმა.