"ერთიან ნაციონალურ მოძრაობაში" მიმდინარე პროცესებთან დაკავშირებით ჩიორა თაქთაქიშვილის მიერ გაკეთებულ განცხადებას, საპარლამენტო უმცირესობის წევრი ოთარ კახიძე ეხმაურება.

კახიძის თქმით, თაქთაქიშვილის მხრიდან, "უხერხულია ბრალდებების გაჟღერება".

„ჩიორა თაქთაქიშვილის ეს განცხადება შეუძლებელია სერიოზულად აღიქვა. რაც შეეხება ფორმალურ მართვას, პარტიას მართავს პოლიტიკური საბჭო. ჩვენ ვნახეთ, რომ 25-მა ადამიანმა და მათ შორის ჩიორა თაქთაქიშვილმა გადაწყვიტა საკითხი, ისე როგორც თავად თაქთაიშვილი და მისი თანამოაზრეები თვლიდნენ საჭიროდ. პარტიის ამაზე მეტად დემოკრატიულად მართვა, უბრალოდ არ არსებობს. ჩიორა თაქთაქიშვილის ხმამ გადაწყვიტა, როგორ უნდა ჩატარებულიყო ყრილობა. გაუგებარია, რა არაფორმალურ მმართველობაზეა საუბარი. რაც შეეხება უხერხულ ბრალდებას, პარტიის აღმასრულებელმა მდივანმა სერგო რატიანმა გასცა პასუხი, რომ ეს არის დაკავშირებული პარტიაში გარკვეულ რეორგანიზაციასთან, ხარჯების ოპტიმიზაციასთან. ამ ყველაფერს არავითარი კავშირი არ აქვს პოლიტიკურ გუნდურობასთან. უხერხულია, ასეთი ბრალდებების გაჟრეღება უაპელაციოდ,“ - განაცხადა ოთარ კახიძემ.

ჩიორა თაქთაქიშვილი აცხადებს, „ნაციონალური მოძრაობის“ მმართველმა გუნდმა პარტიის რამდენიმე წევრი, მათ შორის, კობა ხაბაზი და გოგა ონიანი „შემცირებაში მოაყოლა“.

"კობა ხაბაზი, თავისუფალი ზონის დამფუძნებელი და ენმ-ს რეგიონული დეპარტამენტის გურიის კოორდინატორი, გოგა ონიანი - ენმ-ს ერთ-ერთი იურისტი, პარტიის აქტივისტების ადმინისტრაციული და სისხლის სამართლებრივი დევნის საკითხებზე, ზურაბ ცერცვაძე - საჩხერეში ენმ-ს მაჟორიტარობის კანდიდატი და რეგიონული დეპარტამენტის იმერეთის კოორდინატორი, გიორგი ხურცილავა - 2002 წლიდან პარტიის თანამშრომელი, რეგიონული დეპარტამენტის ქვემო-ქართლის კოორდინატორი, ვაჟა წოწკოლაური - 2002 წლიდან პარტიის თანამშრომელი, ფრაქციის აპარატის უფროსი და მცხეთა-მთიანეთში წარმომადგენელი, გიორგი ბაბაკიშვილი, ენმ-ს ერთ-ერთი იურისტი, რომლებიც ღიად მხარს უჭერდნენ დიდი, 7000-დელეგატიანი ყრილობის ჩატარებას, შემცირებაში მოაყოლა "შიდადემოკრატიის" სახელით მოქმედმა ენმ-ს მმართველმა გუნდმა", - წერს თაქთაქიშვილი სოციალურ ქსელში.