მივესალმები ძველ გუდაურელებს, იმ ადამიანებს, რომელთა ენთუზიაზმითაც დაიწყო გუდაურის იდეა და აშენდა ეს მართლაც და მსოფლიოში ერთ-ერთი უმშვენიერესი კურორტი, - განაცხადა საქართველოს პრემიერ მინისტრმა, გიორგი კვირიკაშვილმა გუდაურში, სადაც დღეს მთავრობის წევრებთან ერთად, ახალი საბაგიროს გახსნას დაესწრო.

მისი თქმით, ადგილობრივების ღვაწლი კურორტის შექმნაში "გმირობის ტოლფასია".

"ათმაგად მნიშვნელოვანია თქვენი გმირობა და ის უდიდესი ღვაწლი, რომელიც ამ უმშვენიერესი კურორტის შექმნაში მიგიძღვით. ჩვენ ღირსეულად ვაგრძელებთ თქვენს საქმეს და ძალიან დიდი გეგმები გვაქვს. ბოლო წლების განმავლობაში ძალიან ბევრი რამ გაკეთდა და შეიძლება ითქვას, რომ ორნახევარჯერ არის გაზრდილი ბოლო ოთხი წლის განმავლობაში ტურისტების რაოდენობა. ასევე, ეს არის ის უახლესი სისტემები, ის უახლესი საბაგიროები, სასტუმროები და ინვესტიციები რომლებიც დღეს აქ ხორციელდება”, - განაცხადა პრემიერ მინისტრმა.

გიორგი კვირიკაშვილის თქმით, უკვე დასრულებულია გუდაურის განვითარების გენერალურ გეგმაზე მუშაობა კანადურ კომპანია “ეკოსაინთან” ერთად, რაც იძლევა საშუალებას, რომ კურორტი გეგმაზომიერად და მსოფლიოს საუკეთესო სტანდარტებთან შესაბამისად განვითარდეს.

“ჩვენ დღეს აქ ამოვედით, რომ გავხსნათ მსოფლიოში წამყვანი კომპანია "Doppelmayr"-ის მიერ დამონტაჟებული ახალი საბაგირო, რომელიც თვისობრივად გააუმჯობესებს მომსახურებას კურორტ გუდაურში. ჩვენ დავასრულეთ კანადურ კომპანია "ეკოსაინთან" ერთად გუდაურის განვითარების გენერალური გეგმა და დღეიდან მოყოლებული ქაოსური განვითარება აღარ იქნება ამ კურორტზე და იქნება გეგმაზომიერი, თანამედროვე და მსოფლიოს საუკეთესო სტანდარტებთან შესაბამისი განვითარება. ეს მოითხოვს გარკვეულ რეგულაციებს ამ განვითარების დროს, მაგრამ ეს იქნება იმისათვის, რომ უფრო მეტი შემოსავალი ნახოს თითოეულმა სასტუმრომ, რომელიც აქ არსებობს, საოჯახო და დიდმა სასტუმროებმა”, - აღნიშნა გიორგი კვირიკაშვილმა.