ადიგენის მუნიციპალიტეტში გაზიფიცირების სამუშაოები მიმდინარეობს. როგორც Guardian.ge-ს ადიგენის გამგებელმა, ზაქარია ენდელაძემ განუცხადა, 2016 წელს, პირველად, მუნიციპალიტეტის ისტორიის მანძილზე, სამი სოფლის, უდის, არლის და წარბასთუმანის მოსახლეობის ნაწილმა ბუნებრივი აირით სარგებლობა დაიწყო.

გამგებლის თქმით, ამჟამად ეტაპობრივი დატვირთვა და დაბა აბასთუმნის მიმართულებით, გაზის მაგისტრალის მშენებლობა მიმდინარეობს.

„მინდა გითხრათ, რომ მუნიციპალიტეტისთვის ამას აქვს სასიცოცხლო მნიშვნელობა. გაზი არის ის პროდუქტი, რომელიც განსაკუთრებულ როლს თამაშობს ნებისმიერი კუთხით. იმ მუნიციპალიტეტისთვის, სადაც არასოდეს გაზი არ ყოფილა, გასაგებია, თუ რა მაღალი მნიშვნელობის არის ეს ჩვენი საზოგადოებისთვის. დიდი სიხარულით ვადევნებთ პროცესებს თვალ-ყურს, მოსახლეობა არის ძალიან კმაყოფილი ამ პროექტის და არამარტო ამ პროექტის განხორციელებით. მე, როგორც ამ მთავრობის წევრს, მეამაყება ის პროცესები, რომლებიც დღეს ჩემს ქვეყანაში ვითარდება. ადიგენის მუნიციპალიტეტში, პირველად არსებობის განმავლობაში, ხდება ის პროცესები, რომლებიც არასოდეს არ განხორციელებულა არც ერთი მთავრობის პირობებში", - განუცხადა Guardian.ge-ს ზაქარია ენდელაძემ, რომელმაც დღეს გაზის მაგისტრალის მშენებლობის სამუშაოები პირადად მოინახულა.