პოლიტოლოგი, დამოუკიდებელ ექსპერტთა კლუბის პრეზიდენტი სოსო ცისკარიშვილი აცხადებს, რომ ფლობს ინფორმაციას იმის თაობაზე, რომ ქვეყნის „კადრებთუხუცესი“ [ბიძინა ივანიშვილი] პრემიერ მინისტრის თაოსნობით მთავრობას დაითხოვს. ამის შესახებ პოლიტოლოგმა გაზეთ „რეზონანსთან“ ინტერვიუში განაცხადა.

„არ მგონია, რომ მომავალი წელი თავად მთავრობისთვისაც სახარბიელო იყოს. ეჭვი მაქვს, რომ შექმნილ სიტუაციას ბევრი მათგანი ვერც კი გაუძლებს… არც ის გაგიკვირდეთ, რომ ზოგიერთმა პარლამენტარმა ან მთავრობის წევრმა საკუთარი კარიერის გაგრძელებაზე უარი განაცხადოს. სიტუაცია ისეთი შეიქმნება, რომ ბევრი თანამდებობის პირი რისკზე წასვლას სახლში წასვლას ამჯობინებს…ამას კი არ ვვარაუდობ, არამედ შესანიშნავად ვფლობ ინფორმაციას იმაზე, თუ ჩვენი კადრებთუხუცესი ვინ არის, ამიტომ წამოჭრილი პროვოკაციული თემები, რომ მთავრობის დათხოვნა პრემიერის ჩათვლით მოხდება, არა მხოლოდ ჭორია“, - განაცხადა სოსო ცისკარიშვილმა.

პოლიტოლოგი მიიჩნევს, რომ „ქართულმა ოცნებამ“ „ყველა ის ქცევა, რისი მიუღებლობითაც ჩვენს საზოგადოებას თავს აწონებდა, გაიმეორა და არაფერი გამოუტოვებია იმ ხრიკებიდან, რომელსაც მისი წინამორბედი ხელისუფლება ჩადიოდა“.

„ამ პარტიის მთავარი ბრძოლის მიზანი არა ჩვენი ქვეყნის მდგრადი განვითარება იყო, არამედ საქართველოს კონსტიტუციის პრივატიზაცია. არჩევნებიდან ორი თვე გავიდა და ეს დრო უკვე გვიჩვენებს, რომ ჩვენი ქვეყანა არც თუ მიმზიდველ რეალობაში აღმოჩნდა“, - აცხადებს სოსო ცისკარიშვილი, რომლის ვარაუდითაც „იმედგაცრუებული ამომრჩეველი“ ახალი ლიდერის ძებნას დაიწყებს.

„რაც უფრო დრო გავა, საზოგადოებაში ახალი პოლიტიკური ძალის გამოჩენის სურვილი და მზაობა გაიზრდება. იმედგაცრუებული ამომრჩეველი, რომელიც უბრალოდ პატარა ბავშვივით მოატყუეს, ახალი ლიდერის ძებნას დაიწყებს.“ - განაცხადა სოსო ცისკარიშვილმა.