ხონის მუნიციპალიტეტის გამგებელი ჯემალ მებუკე აცხადებს, რომ 2016 წელი მუნიციპალიტეტისთვის წარმატებული წელი იყო ინფრასტრუქტურული, სოციალური, ეკონომიკური კულტურული, სპორტული პროგრამებისა და პროექტების განხორციელების თვალსაზრისით. მისი თქმით, მხოლოდ ინფრასტრუქტურულ პროექტებზე წელს 5 მილიონ ლარზე მეტი დაიხარჯა.

„რეგიონული და მუნიციპალური განვითარების ფონდები, „სოფლის მხარდაჭერის პროგრამა“, ადგილობრივი ბიუჯეტი- ყველა ფინანსური წყარო მაქსიმალურად ეფექტურად იქნა ათვისებული. მიმდინარე წელს ხონის მუნიციპალიტეტში დაახლოებით 5 მილიონ ლარზე მეტი ინფრასტრუქტურის განახლებასა და განვითარებაზე დაიხარჯა... აშენდა ხიდები, დაიგო გზები, მოპირკეთდა მრავალბინიანი საცხოვრებელი სახლების ეზოები, მოწესრიგდა სკვერები, სანიაღვრე არხები, აღდგა ხიდ-ბოგირები, გარემონტდა და აშენდა საბავშვო ბაღები, შეკეთდა ბიბლიოთეკები, ამბულატორიები, მოიხრეშა საუბნო გზები, დამონტაჟდა გარე განათების სისტემები, არტეზიული ჭები, დასრულდა სამუსიკო სკოლის რეაბილიტაცია, განხორციელდა ნაპირსამაგრი სამუშაოები მდინარე ცხენისწყალზე, სოფელ ქუტირში მიმდინარეობს საკანალიზაციო სისტემის რეაბილიტაცია, რაც ათეული წლების მანძილზე მოსახლეობას და გარემოს დიდ საფრთხეს უქმნიდა და ზიანს აყენებდა და ეს მასშტაბური პრობლემა გადაწყვეტილი იქნება“, - განაცხადა ჯემალ მებუკემ.

ხონის მუნიციპალიტეტის გამგებლის ინფორმაციით, სოციალური სფეროს მიმართულებით, გამგეობის ჯანდაცვისა და სოციალური პროგრამებით 2016 წელს დახმარება 2 000-მდე მოქალაქეს გაეწია. „ლეიკემია, დიალიზი, ონკოლოგიური დაავადებები, სხვა სამედიცინო გამოკვლევები, ქირურგიული მკურნალობა, მრავალშვილიანი დედები, შშმ ბავშვები, ომის ვეტერანები, სოციალურად შეჭირვებული თანამოქალაქეები, უდედმამო სტუდენტები, 90 წელს გადაცილებული მოხუცები და ა. შ. ჩვენ ვცდილობთ საჭიროებებზე მორგებული პროგრამები შევიმუშავოთ, რათა მოქალაქეებმა იგრძნონ, რომ ადგილობრივი ხელისუფლება ზრუნავს მათზე და მათ კეთილდღეობას ემსახურება“, - აღნიშნა გამგებელმა, რომლის თქმითაც, 2016 წელი წარმატებული იყო ეკონომიკური, კულტურული, სპორტული თუ სხვა აქტივობების მხრივაც.

„წლის განმავლობაში მუნიციპალიტეტის საკუთრებაში დამატებითი ქონების სახით დავარეგისტრირეთ სახელმწიფო საკუთრებაში არსებული უძრავი ქონება - სულ 6 ერთეული, საერთო ფართით - 2872,04 კვ.მ (შენობა-ნაგებობები), არასასოფლო-სამეურნეო დანიშნულების მიწის ნაკვეთები 29 ერთეული, საერთო ფართით - 87 975 კვ.მ, და სასოფლო - სამეურნეო მიწის ნაკვეთი 27 ერთეული, საერთო ფართით- 1249768 კვ.მ.

აქვე მინდა ვთქვა, ქალაქში და მის შემოგარენში დაირგო ასობით ახალი ნერგი. ხელისუფლებაში მოსვლის დღიდან გამწვანება ჩვენი ერთ- ერთი პრიორიტეტია და მომავალშიც არაერთი აქციის გამართვას ვგეგმავთ.

როცა ვსაუბრობთ 2016 წლის მიღწევებზე არ შეიძლება არ აღინიშნოს კულტურული და სპორტული ღონისძიებების მრავალფეროვნება:

თეატრის ხელშეწყობის პროგრამის ფარგლებში განხორციელდა რეგიონული ფესტივალი „იმერეთი 2016“, სადაც ხონის სახალხო თეატრი ღირსეულად წარსდგა.

ქართული სიმღერისა და ფოლკლორის განვითრება-პოპულარიზაციის მიზნით მუნიციპალიტეტის კოლექტივებმა მონაწილეობა მიიღეს ფესტივალში - „არტ გენი 2016“.

წარმატებით მუშაობდა ისტორიული მუზეუმი და მის დაქვემდებარებაში შემავალი პოლიკარპე კაკაბაძის, ირაკლი აბაშიძისა და საბრძოლო დიდების მუზეუმები. საინტერესო მუშაობა იქნა გაწეული საბიბლიოთეკო საქმიანობის ხელშეწყობის მიმართულებით. განახლდა ბიბლიოთეკების წიგნადი ფონდი.

ხონმა პირველად სახელოვნებო არტ-რეზიდენციას უმასპინძლა. პროექტის ფარგლებში ხონის სამხატვრო სკოლაში ოთხი სხვადასხვა ქვეყნის არტისტები (საფრანგეთიდან, ავსტრიიდან, სლოვენიიდან, ლატვიიდან) ორი კვირის განმავლობაში ადგილობრივებს თავის გამოცდილებას უზიარებდნენ და ადგილობრივ ღირსშესანიშნაობებს ეცნობოდნენ. ხელოვანებმა ამ დროის განმავლობაში შექმნილი ნამუშევრები საჩუქრად მუნიციპალიტეტს გადასცეს.

წელსვე ჩვენს მუნიციპალიტეტში განხორციელდა ახალგაზრდული პროექტი სინემა „ხონი“, რომელმაც დიდი მოწონება დაიმსახურა. პროექტის ფარგლებში თბილისელი ახალგაზრდები 10 დღის განმავლობაში იმყოფებოდნენ ხონში, სწავლობდნენ კინოხელოვნებას, ფოტოგრაფიას, გამოცდილებას უზიარებდნენ ადგილობრივ თანატოლებს...

ხონელმა ახალგაზრდა სპორტსმენებმა წარმატებებს მიაღწიეს საქართველოსა და რეგიონის მასშტაბით გამართულ სპორტულ ასპარეზობებში.

ათეული წლების შემდეგ წელს პირველად ხონმა უმასპინძლა ჭადრაკის ფესტივალს „ხონი 2016“-ს და მასში მონაწილეობა სამეგრელოსა და იმერეთის 200 - მდე სპორტსმენმა სპორტული ღონისძიება შედგა და, ამიერიდან, ფესტივალი ყოველ წელს გაიმართება.

ნოემბრის თვეში მასშტაბურად აღინიშნა ხონი- სამტრედიის ეპარქიის 20 წლის იუბილე. და ეს ყველაფერი ადგილობრივი სამსახურებისა და სამთავრობო სტრუქტურების კოორდინირებული მუშაობის შედეგია. იმედს ვიტოვებ, რომ მომავალი წელი კიდევ უფრო ნაყოფიერი იქნება. მიუხედავად სიძნელეებისა, ჩვენ აუცილებლად გავძლიერდებით“, - განაცხადა ხონის მუნიციპალიტეტის გამგებელმა, ჯემალ მებუკემ.

ინფორმაციას ხონის მუნიციპალიტეტის გამგეობის პრეს-სამსახური ავრცელებს.