რუსეთის საგარეო საქმეთა მინისტრი სერგეი ლავროვი 35 ამერიკელი დიპლომატის "პერსონა ნონ გრატად" გამოცხადების ინიციატივით გამოდის.

ობამას ადმინისტრაციის სანქციებზე საპასუხოდ, რუსეთის საგარეო საქმეთა მინისტრი პრეზიდენტ ვლადიმერ პუტინს 35 ამერიკელი დიპლომატის ქვეყნიდან გაძევებას სთავაზობს.

ლავროვის განცხადებით, საუბარია მოსკოვში ამერიკის საელჩოს 31 და სანკტ-პეტერბურგში გენერალური საკონსულოს 4 თანამშრომელზე.

მას შემდეგ, რაც შეერთებულმა შტატებმა, მოსკოვის მიერ 8 ნოემბრის საპრეზიდენტო არჩევნებში სავარაუდო ჩარევის გამო 35 რუსი დიპლომატის ამერიკიდან გაძევების გადაწყვეტილება მიიღო, რუსეთმა პირობა დადო, რომ ვაშინგტონის ნაბიჯს პასუხს გასცემს.

ვლადიმერ პუტინის წარმომადგენელმა, დიმიტრი პესკოვმა განაცხადა, რომ კრემლის რეაქცია შეერთებულ შტატებს „მნიშვნელოვან დისკომფორტს“ შეუქმნის. მიუხედავად ამისა, მან ნართაულად თქვა, რომ რუსეთი შესაძლოა დაელოდოს დონალდ ტრამპის თეთრ სახლში შესვლას, რომელიც ამერიკის არჩევნებზე რუსეთის ჰაკერულ თავდასხმას გამორიცხავს და მას „სასაცილოს“ უწოდებს, - ბრალდება, რის გამოც ვაშინგტონმა რუსი დიპლომატების ამერიკიდან გაძევების და მოსკოვისთვის ახალი სანქციების დაწესების გადაწყვეტილება მიიღო.

შეერთებული შტატების სახელმწიფო დეპარტამენტმა 35 რუსი დიპლომატი ვაშინგტონ დი-სი-ს საელჩოდან და სან ფრანცისკოს საკონსულოდან „პერსონა ნონ გრატად“ გამოაცხადა და მათ და თავიანთ ოჯახებს 72 საათი მისცა შეერთებული შტატების დასატოვებლად.

ვაშინგტონი ასევე დახურავს ორ რუსულ სტრუქტურას მერილენდსა და ნიუ იორკში, რომელიც გამოყენებული იყო სადაზვერვო შეკრებებისთვის.