საქართველოს ყოფილი პრეზიდენტი, ოდესის ოქლის ყოფილი გუბერნატორი მიხეილ სააკაშვილი ქართველი ხალხისადმი საახალწლო მილოცვის ვიდეოს ავრცელებს, რომელშიც ამბობს, რომ „როგორც არასდროს, მჯერა საქართველოს უკეთესი მომავლის და ნათელი პერსპექტივის, იმიტომ, რომ ჩვენ ამ წლებში, იმ წლებში ვნახეთ, რომ ქართველებს შეძლებიათ აღმშენებლობა“.

„მინდა თითოეულ ქართულ ოჯახს ვუსურვო ბედნიერება დამდეგ ახალ წელს. თქვენ გახსოვთ, რომ ჩემი პრეზიდენტობის წლებში, ჩემი მომართვის დროს ვსაუბრობდი დიდ განვითარებაზე, დიდ პროგრესზე, დიდ წინსვლაზე, იმ გიგანტურ ნაბიჯებზე, რომელსაც საქართველო დგამდა იმ წლებში. მაშინდელი ჩვენი განვითარება იყო მისაბაძი და ზოგისთვის შურის საგანი, არა მოხლოდ პოსტ-საბჭოთა სივრცეზე, არამედ ბევრისათვის, მსოფლიოს მასშტაბით. შემდეგ ეს ყველაფერი ერთბაშად შეჩერდა და ბევრი რაღაცა უკანაც წავიდა. და მე ვიცი, რომ ძალიან ბევრ ქართულ ოჯახს ძალიან უჭირს, მე ვიცი, რომ ძალიან ბევრ თქვენგანს ეკარგება მომავლის პერსპექტივა და იმედი, მაგრამ მინდა გითხრათ, მიუხედავად ყველაფრისა, მიუხედავად ჩემი საკუთარი დევნილობისა, როგორც არასდროს, მჯერა საქართველოს უკეთესი მომავლის და ნათელი პერსპექტივის, იმიტომ, რომ ჩვენ ამ წლებში, იმ წლებში ვნახეთ, რომ ქართველებს შეძლებიათ აღმშენებლობა, რომ ქართველებს შეუძლიათ განსაკუთრებული რაღაცები შექმნან, რომ ქართველებს შეუძლიათ მართლაც მუხლჩაუხრელი შრომა და ბრძოლა საკუთარი ქვეყნისთვის. ჩვენ ეს დავინახეთ და ამას ვეღარაფერი დაგვავიწყებს. ჩვენ ვერ მოგვახვევენ თავზე უიმედობას. რაც არ უნდა იყოს, რა შემოტევაც არ უნდა იყოს, რა პროპაგანდაც არ უნდა მუშაობდეს, რა ღალატსაც არ უნდა ჰქონდეს ადგილი, მაინც უმრავლესობა, აბსოლუტური უმრავლესობა საქართველოში არის ძალიან პატრიოტი, ერთგული, მაგარი ხალხი. მე მინდა მოგმართოთ თქვენ, ყველაფერი გამოგვივა თუ ვირწმუნებთ ჩვენი ძალების. მე მინდა თითოეულ ოჯახს ვუსურვო ბედნიერება და წინსვლა დამდეგ ახალ წელს“, - განაცხადა საქართველოს ყოფილმა პრეზიდენტმა, მიხეილ სააკაშვილმა საახალწლო მიმართვაში, რომელიც კიევში არის ჩაწერილი და დაამატა, რომ „ყველაზე საუკეთესო წლები არის წინ“.