სრულიად საქართველოს კათოლიკოს-პატრიარქმა, უწმინდესმა და უნეტარესმა, ილია მეორემ საქართველოს მოსახლეობას ახალი წლის დადგომა მიულოცა. როგორც პატრიარქმა ბრძანა. „იმედით უნდა ვუყუროთ ჩვენს მომავალს და ვიფიქროთ ჩვენ სამშობლოზე. სამშობლო უპირველეს ყოვლისა“. მან ასევე აღნიშნა, რომ „არც ერთი ადამიანი არ უნდა დარჩეს შრომის გარეშე, მისი მოღვაწეობა უნდა იყოს სამშობლოს საკეთილდღეოდ“.

„ყველას გულითადად მოგესალმებით და გილოცავთ ახალ წელს. დღეს ჩვენ უნდა ვიფიქროთ ჩვენს წარსულზე და უპირველს ყოვლისა, მადლობა შევწიროთ უფალს, რომელმაც მოიღო წყალობა. ჩვენ მადლობა უნდა შევწიროთ უფალს იმ განსასცდელებისთვის, იმ სიყვარულისთვის, რომელიც მოგვივლინა, მადლობა უნდა შევწიროთ მშობლებს ლოცვა-კურთხევისთვის, განსაკუთრებული მადლიერება და პატივისცემა გამოვიჩინოთ მათ მიმართ. ღმერთმა ინებოს, რომ მომავალი წელი იყოს ბედნიერი, მშვიდობიანი, სასიხარულო. იმედით უნდა ვუყუროთ ჩვენს მომავალს და ვიფიქროთ ჩვენ სამშობლოზე. სამშობლო უპირველეს ყოვლისა. როცა ჩვენ ვფიქრობთ, რას მოგვიტანს მომავალი წელი, ჩვენ უნდა ვიფიქროთ, ჩვენ რას გავაკეთებთ სამშობლოსთვის. არც ერთი ადამიანი არ უნდა დარჩეს შრომის გარეშე, მისი მოღვაწეობა უნდა იყოს სამშობლოს საკეთილდღეოდ. მე იმედით ვუყურებ საქართველოს მომავალს. მინდა, დავლოცო დღეს აფხაზეთის, ცხინვალის რეგიონი, მთელი საქართველო და გისურვოთ, რომ დადგეს ის დრო, როცა ჩვენ ერთად გავიხარებთ, ერთად გავიზიარებთ ჩვენს მთლიანობას და ბედნიერებას. ბედნიერი იყავით, ამინ",-ბრძანა საქართველოს კათოლიკოს-პატრიარქმა საახალწლო მილოცვაში, რომელიც პირდაპირ ეთერში „საზოგადოებრივი მაუწყებლით“ გადაიცა.