საქართველოში უკრაინიდან ჩამოსული ამერიკელი სენატორების ჯგუფი, რომლის შემადგენლობაშიც გავლენიანი „რესპუბლიკელი“ სენატორი არიზონას შტატიდან, ჯონ მაკკეინი იმყოფება, ცოტა ხნის წინათ სოფელ ხურვალეთს სტუმრობდა, სადაც მან რუსი ოკუპანტების მიერ გავლებული მავთულხლართების მიღმა მცხოვრებ დავით ვანიშვილს ახალი წელი მიულოცა და ტკბილეული გადასცა.

მაკკეინმა, რომელიც შეერთებული შტატების სენატის შეიარაღებული ძალების კომიტეტის თავმჯდომარეა, ქართველ ჯარისკაცებს საერთაშორისო მისიაში მონაწილეობისთვის მადლობა გადაუხადა.

„ჩვენ მადლობელი ვართ ქართველი ხალხის, ქართველი ჯარისკაცების, რომლებიც სხვადასხვა მისიებში მონაწილეობენ. ჩვენ უნდა განვაგრძოთ ეს ურთიერთობა და თანამშრომლობა, რადგან თუ ერთად არ ვიდგებით, ეს იქნება ვლადიმერ პუტინისთვის იმის შესაძლებლობა, რომ დაგვამარცხოს“, - განაცხადა ჯონ მაკკეინმა.

საქართველოს სახელმწიფო უსაფრთხოების სამსახურის ცნობით, უწყების საინფორმაციო-ანალიტიკური დეპარტამენტის წარმომადგენლებმა დელეგაციის წევრებს გააცნეს ყველა ის გამოწვევა და საფრთხე, რომელიც ოკუპირებული ცხინვალის რეგიონიდან მომდინარეობს. გარდა ამისა, სუს-ის წარმომადგენლებმა სენატორებს მიაწოდეს ინფორმაცია იმ პრობლემებზე, რომელიც ადგილობრივ მოსახლეობას ყოველდღიურად მავთულხლართებით, ღობეებით, თუ სხვა ხელოვნური ბარიერებით ექმნება.

ამერიკელი სენატორები საქართველოს 2 იანვარს დატოვებენ, მანამდე კი ისინი საქართველოს ხელისუფლების პირველ პირებთან შეხვედრებს გამართავენ.