ბარაქ ობამას მიერ შეერთებული შტატებიდან გაძევებულმა 35-მა რუსმა დიპლომატმა, რომელთაც მხოლოდ 72 საათი ჰქონდათ მიცემული ქვეყნის დასატოვებლად, ვაშინგტონი დატოვეს. ინფორმაციას ამის შესახებ რუსეთის ახალი ამბების სააგენტოები ავრცელებენ.

ვაშინგტონში რუსეთის საელჩოს ოფიციალურმა პირმა განაცხადა, რომ „პერსონა ნონ გრატად“ გამოცხადებული ყველა დიპლომატი და მათი ოჯახების წევრები მოსკოვში „რუსეთის ავიახაზების“ სპეციალური სამთავრობო თვითმფრინავით გაემგზავრნენ.

ობამას ბრძანება, ამერიკიდან რუსი დიპლომატების გაძევებასთან დაკავშირებით რუსეთის მიერ აშშ-ის „დემოკრატიულ პარტიასა“ და ჰილარი კლინტონის 2016 წლის საარჩევნო კამპანიაზე სავარაუდო ჰაკერულ თავდასხმას მოჰყვა - ბრალდება, რასაც რუსეთი უარყოფს, ხოლო დონალდ ტრამპი „სასაცილოს“ უწოდებს.

ამერიკის შეერთებული შტატების საპრეზიდენტო არჩევნებზე რუსეთის მიერ ჰაკერული თავდასხმის ბრალდების კვალდაკვალ ვაშინგტონის მიერ ქვეყნიდან რუსი დიპლომატების მასობრივი გაძევების გადაწყვეტილების გამოცხადების შემდეგ ვლადიმერ პუტინმა გამორიცხა კრემლის მიერ ანალოგიური ნაბიჯის გადადგმა და განაცხადა, რომ რუსეთი არ უნდა „დამდაბლდეს“ „სამზარეულოს დიპლომატიის“ დონეზე, მაგრამ ხაზი გაუსვა, რომ იმუშავებს, რათა აღადგინოს დიპლომატიური კავშირები დონალდ ტრამპის პრეზიდენტობის პერიოდში.

პუტინმა ბარაქ ობამას ადმინისტრაციის არამეგობრული ნაბიჯები დაახასიათა, როგორც „პროვოკაციული, მიმართული რუსულ-ამერიკული ურთიერთობების შემდგომი აფეთქებისკენ“.

„ეს აშკარად ეწინააღმდეგება ძირითად ინტერესებს, როგორც რუსი, ისე ამერიკელი ხალხისა. მსოფლიო უსაფრთხოების შესანარჩუნებლად რუსეთისა და შეერთებული შტატების განსაკუთრებული პასუხისმგებლობის გათვალისწინებით - ეს ზიანს აყენებს საერთაშორისო ურთიერთობების მთელ კომპლექსს“, - აღნიშნულია რუსეთის პრეზიდენტის განცხადებაში.

პუტინის ამ განცხადებამდე რუსეთის საგარეო საქმეთა სამინისტრომ ოფიციალურად სთხოვა პრეზიდენტ პუტინს, გაეძევებინა 35 ამერიკელი დიპლომატი მოსკოვიდან.

პარასკევს, შეერთებული შტატების არჩეულმა პრეზიდენტმა, დონალდ ტრამპმა შეაქო ვლადიმერ პუტინი მას შემდეგ, რაც ამერიკის საპრეზიდენტო არჩევნებზე რუსეთის მხრიდან ჰაკერული თავდასხმის ბრალდების გამო ვაშინგტონმა ქვეყნიდან რუსი დიპლომატების გაძევების გადაწყვეტილება მიიღო და რუსეთის პრეზიდენტმა ობამას ქმედების საპასუხოდ ამერიკელი დიპლომატების მიმართ ანალოგიური ნაბიჯი არ გადადგა.

ტრამპმა „თვითერზე“ დაწერა: „დიდებული ნაბიჯი გადადებაზე (ვლადიმერ პუტინის მიერ) - მე ყოველთვის ვიცოდი, რომ ის ძალიან გონიერი იყო!“

შეერთებულმა შტატებმა, მოსკოვის მიერ 8 ნოემბრის საპრეზიდენტო არჩევნებში სავარაუდო ჩარევის გამო 35 რუსი დიპლომატის ამერიკიდან გაძევების გადაწყვეტილება ხუთშაბათს, 29 დეკემბერს, მიიღო.

ვაშინგტონი ასევე დახურავს ორ რუსულ სტრუქტურას მერილენდსა და ნიუ იორკში, რომელიც გამოყენებული იყო სადაზვერვო შეკრებებისთვის.

პრეზიდენტმა ბარაქ ობამამ პირობა დადო, რომ რუსეთის წინააღმდეგ ქმედით ნაბიჯებს გადადგამდა, რაც მიმართული იქნებოდა შეერთებული შტატების ბრალდებების კვალდაკვალ იმის პასუხის გაცემისკენ, რომ კრემლი „დემოკრატიული პარტიის“ საპრეზიდენტო კანდიდატის, ჰილარი კლინტონის საწინააღმდეგოდ ჩაერია 8 ნოემბრის საპრეზიდენტო არჩევნებში.

შეერთებული შტატების სახელმწიფო დეპარტამენტმა 35 რუსი დიპლომატი ვაშინგტონ დი-სი-ს საელჩოდან და სან ფრანცისკოს საკონსულოდან „პერსონა ნონ გრატად“ გამოაცხადა და მათ და თავიანთ ოჯახებს 72 საათი მისცა შეერთებული შტატების დასატოვებლად.

ასევე სანქციები გამოცხადდა 9 სტრუქტურული ერთეულის და ინდივიდის, მათ შორის რუსული სადაზვერვო სააგენტოების, „გრუ“-სა და ეფ-ეს-ბე“-ს წინააღმდეგ.

შეერთებული შტატების ფინანსთა სამინისტრომ განაცხადა, რომ ნაბიჯი მიმართულია მათკენ, ვინც პასუხისმგებელია „საარჩევნო პროცესის და ინსტიტუტების ძირის გამოთხრაზე“.

ბარაქ ობამამ განცხადებაში თქვა, რომ „ყველა ამერიკელი შეშფოთებული უნდა იყოს რუსეთის ქმედებებით“.

მან ვაშინგტონის ნაბიჯებს უწოდა „საჭირო და სათანადო პასუხი შეერთებული შტატების ინტერესების დაზიანების ძალისხმევებისთვის“ და დაამატა, რომ ეს „არ იქნება სრული პასუხი რუსეთის აგრესიული ქმედებებისადმი“.