„საზოგადოებრივმა მაუწყებელმა" უნდა დაიწყოს ბრძოლა - ჩვენ უნდა გავხდეთ ერთ-ერთი ძირითადი მოთამაშე მედია-ბაზარზე, - აღნიშნული განცხადება „საზოგადოებრივი მაუწყებლის" ახლადარჩეულმა გენერალურმა დირექტორმა, ვასილ მაღლაფერიძემ გააკეთა.

მისი თქმით, განსაკუთრებული ყურადღება ახალ ამბებსა და გადაცემებს დაეთმობა.

„ჩვენ ორშაბათიდან უნდა დავიწყოთ აღწერა, ინვენტარიზაცია და გავიგოთ რა შესაძლებლობები გაგვაჩნია.... რასაკვირველია, განსაკუთრებული ყურადღების ქვეშ იქნება ნიუსრუმი, საიდანაც უნდა მომზადდეს ახალი ამბები და რასაკვირველია, გადაცემები", - განაცხადა მაღლაფერიძემ „საზოგადოებრივი მაუწყებლის" პირდაპირ ეთერში სატელეფონო ჩართვისას.

კითხვაზე, თუ რა გეგმები აქვს მაუწყებლის გენერალურ დირექტორს საკადრო ცვლილებებთან დაკავშირებით, მაღლაფერიძე პასუხობს:

„საზოგადოებრივი მაუწყებელი" არის, მე ვფიქრობ, ძალიან მაღალი ინტელექტუალური რესურსით. უბრალოდ მას სჭირდება სწორად ორგანიზება. ჩემი ძირითადი საყრდენი იქნება, რასაკვირველია, ადგილობრივი კადრები. რაღაც გარკვეული ცვლილებები შეიძლება მოხდეს და ეს ბუნებრივი ამბავია. „საზოგადოებრივი მაუწყებელი" ყოველთვის გახსნილი იქნება და უნდა იყოს გახსნილი, ასე ვთქვათ, იმ კადრებისთვის, რომლებიც ჩვენ დაგვჭირდება. ჩემი ძირითადი საყრდენი არის „საზოგადოებრივი მაუწყებლის" არსებული მდგომარეობა", - აღნიშნა მაღლაფერიძემ.

ჟურნალისტის კითხვაზე, თუ რას უპასუხებდა სკეპტიკოსებს, რომლებიც ნეგატიურად უყურებდნენ მისი „საზოგადოებრივი მაუწყებლის" გენერალურ დირექტორად დანიშვნას, მაღლაფერიძე აცხადებს, რომ „სკეპტიკოსებს აქვთ ამის უფლება".

"არ ვაპირებ სკეპტიკოსებს მჭერმეტყველებაში გავეჯიბრო", - აღნიშნა ვასილ მაღლაფერიძემ.