საქართველოს თავდაცვის სამინისტროს ინფორმაციით, I ქვეითი ბრიგადის გაძლიერებული ასეული ავღანეთში ნატოს ეგიდით მიმდინარე „მტკიცე მხარდაჭერის“ მისიაში მონაწილეობისთვის უკვე მზადაა.

თავდაცვის უწყების ცნობით, ქართველი მშვიდობისმყოფელების გაცილების ცერემონიალი გორში, I ქვეითი ბრიგადის სამწყობრო მოედანზე გაიმართა. საზეიმო ცერემონიალი საქართველოს სახელმწიფო ჰიმნით გაიხსნა.

ქართველ სამხედროებს მისიის წარმატებით შესრულება და სამშობლოში მშვიდობით დაბრუნება საქართველოს შეიარაღებული ძალების გენერალური შტაბის უფროსის პირველმა მოადგილემ, პოლკოვნიკმა ნიკოლოზ ჯანჯღავამ უსურვა.

ღონისძიებას სახმელეთო ჯარების აღმოსავლეთ სარდალი, პოლკოვნიკი შავლეგო ტაბატაძე და გერმანიის სამხედრო ატაშე საქართველოში, ვიცე-პოლკოვნიკი ფრანც-იოზეფ ნოლტე დაესწრნენ.

ასეულის ავღანეთში გაცილების ცერემონიალზე იმყოფებოდნენ ქართველი მშვიდობისმყოფელების ოჯახის წევრებიც.

ღონისძიების დასასრულს ჯარისკაცები კაპელანმა, მამა გიორგიმ დალოცა.

„I ქვეითი ბრიგადის ასეული მაზარ-ი-შარიფში ბაზა „მარმალზე“ II ქვეითი ბრიგადის გაძლიერებულ ასეულს, როტაციის წესით, ჩაანაცვლებს. გაძლიერებული ასეულის პირადი შემადგენლობა, მაიორ მიხეილ მეზვრიშვილის მეთაურობით, შვიდი თვის განმავლობაში ავღანეთში, გერმანული სარდლობის დაქვემდებარებაში შეასრულებს საერთაშორისო მისიას. ქვედანაყოფის მთავარი ამოცანა საჭიროების შემთხვევაში მოკავშირე და ადგილობრივი უსაფრთხოების ძალების მხარდაჭერა და სწრაფი რეაგირება იქნება. „მტკიცე მხარდაჭერის“ მისიისთვის მომზადება ასეულმა ჯერ საქართველოში, მანავში, რეინჯერთა მომზადების სკოლაში სამი თვის განმავლობაში ქართველი ინსტრუქტორების ზედამხედველობით გაიარა, შემდეგ კი, - ხუთი თვის განმავლობაში გერმანიაში, 37-ე ბრიგადის დისლოკაციის ადგილზე, გერმანელი ინსტრუქტორების ზედამხედველობით. ასეულის პირადი შემადგენლობის გადასროლისწინა წვრთნა გერმანიაში სამ ფაზად იყო დაყოფილი. სამხედროებმა ინდივიდუალური, ათეულის, ოცეულის და ასეულის დონის შემაჯამებელი სწავლებები გაიარეს, მათ შორის, სამედიცინო, საცეცხლე, საინჟინრო, კავშირგაბმულობა, ტაქტიკური სწავლება ყველა დონეზე და სწავლებაზე ორიენტირებული მეცადინეობებისთვის სამეთაურო რგოლის შეკრება“, - აცხადებენ თავდაცვის სამინისტროში.