ლევან გაჩეჩილაძის შვილი რატი გაჩეჩილაძე სოციალურ ქსელში წერს, რომ ტელეკომპანია „რუსთავი 2"-ის გენერალურ დირექტორთან დაკავშირებულ ინციდენტში მონაწილეობდა.

„ღიად ვაცხადებ: ეს შემთხვევა, რომელიც რესტორან Dinning room-ში მოხდა, იყო ჩემი რეაქცია იმ ფიზიკურ და მორალურ შეურაცხყოფაზე, რომელიც მე და ჩემმა ოჯახმა განვიცადეთ განვლილი წლების განმავლობაში გვარამიას და არა მხოლოდ მისგან. ჩემს გარდა იმ ინციდენტში არ მონაწილეობდა არავინ. ცხადია, მისი მამის გარდაცვალების შესახებ არ ვიცოდი და არც შეიძლება მცოდნოდა. ადვოკატთან ერთად დღესვე, მე თვითონ გამოვცხადდები შესაბამის უწყებაში,“- წერს სოციალურ ქსელში რატი გაჩეჩილაძე.

ნიკა გვარამიას განცხადებით, თავს მაშინ დაესხნენ, როდესაც რესტორან Dinning room-ში მეგობრებთან ერთად იმყოფებოდა.

"დღეს მამა დავასაფლავე და მძიმე ხასიათზე ვარ. მეგობრებმა რესტორან დაინინგ რუმსში წამიყვანეს, ცოტა მდგომარეობიდან რომ გამოვეყვანეთ. შუქი ჩაქრა და უკვე წამოსასვლელად ვემზადებოდით, რომ თავს დაგვესხნენ ჩუმად, მიპარვით, სიბნელეში. მოგვაყენეს ფიზიკური შეურაცხყოფა. მე ბოლო დღეების უძილობის და სტრესის გამო, იმდენად გაბრუებული ვარ, ვერც მოვასწარი რეაგირება და საერთოდაც ვერაფერს მივხვდი, სანამ იატაკზე არ გამოვფხიზლდი. ეგრევე გამოვიძახე პატრული. ირგვლივ კამერებია.  

თავდამსხმელების მაგიდაზე ყველაფერს მათი ანაბეჭდები აქვს. პირობას ვდებ, არ მივიღებ არავითარ ბოდიშს და მეტანიებს. ნულოვანი ტოლერანტობა. არც მეტი, არც ნაკლები, საფლავის კარამდე ჩავყვები და ვაზღვევინებ ბოლომდე. ცალკე რესტორანი გაწეწავს საქმიანი რეპუტაციის შელახვისთვის. პირობას ვდებ, მათ ფეხ ქვეშ მიწა დაიწვება!", - წერს ნიკა გვარამია „ფეისბუქის" საკუთარ გვერდზე. 

შსს-მ მომხდართან დაკავშირებით გამოძიება 126-ე მუხლის მე-2 ნაწილით დაიწყო.