მარტვილის მუნიციპალიტეტის გამგებელი, ალექსანდრე გრიგალავა guardian.ge -სთან საუბრისას, ადგილობრივი ხელისუფლების ყოფილ პირველ პირებს აკრიტიკებს და ამბობს, რომ მათი ხელმძღვანელ თანამდებობებზე ყოფნისას მარტვილში უძრაობა იყო და ის უმნიშვნელოვანესი პროექტები, რაც მუნიციპალიტეტში, კოალიცია „ქართული ოცნების“ ხელისუფლებაში მოსვლის შემდეგ განხორციელდა, ცენტრალური და არა წინა ადგილობრივი ხელისუფლების დამსახურებაა. მარტვილის შემდგომი ეკონომიკური განვითარებისა და ინვესტიციების მოზიდვისთვის, გამგებელი გაზმომარაგების საკითხის გადაწყვეტის აუცილებლობაზე საუბრობს და ამბობს, რომ აღნიშნული პრობლემის მოუგვარებლობა მუნიციპალიტეტისთვის მილიონობით ინვესტიციის დაკარგვას განაპირობებს.    

„2012 წელს ცენტრალური ხელისუფლების ცვლილების მიუხედავად, 2010 წელს არჩეული ადგილობრივი ხელისუფლება, სანამ თავისი კანონიერი ვადა არ ამოწურა, მანამ მუნიციპალიტეტის მმართველობაში იყო. აქედან გამომდინარე, არანაირი ძვრა, მთელი ამ ხნის მანძილზე არ ყოფილა. თუ რაიმე გაკეთდა, ესეც ცენტრალური ხელისუფლების მუშაობის შედეგად, ისინი კი უბრალოდ დოკუმენტებზე ხელის მომწერები იყვნენ.

უნდა აღინიშნოს, რომ ამ პერიოდში, ცენტრალური ხელისუფლების დაფინანსებით განხორციელდა ორი დიდი პროექტი. პირველი, ჭყონი-თამაკონი-ნამგოლაო-ლეძაძამეს გზის რეაბილიტაცია, რომელიც მალე ნოქალაქევი-სენაკის ცენტრალურ გზას დაუკავშირდება. მარტვილის მუნიციპალიტეტის ტერიტორიაზე ამ გზის მშენებლობა უკვე დასრულებულია და მალე სენაკის მუნიციპალიტეტშიც სრულად მოხდება აღდგენითი სამუშაოების ბოლომდე მიყვანა, რის შემდეგაც გზის აღნიშნული მონაკვეთი მთლიანად მოასფალტებული იქნება.

მეორე პროექტია სენაკი-ბანძა-ლეხაინდრავა-ხონის დამაკავშირებელი გზა, თავისის ხიდებითა თუ ბოგირებით, რომლის საშუალებითაც, მარტვილისა და სენაკის მუნიციპალიტეტებში მცხოვრები მოსახლეობის მნიშვნელოვანი ნაწილი უკავშირდება, როგორც ხონს, ასევე ქუთაისს და აქედან გამომდინარე, ეს პროექტი, ერთ-ერთი უმნიშვნელოვანესი იყო ჩვენი მუნიციპალიტეტებისათვის. მიმდინარე წლისთვის კი გზების მშენებლობისთვის სხვადასხვა ფონდებიდან გამოყოფილი თანხებით დაგეგმილია დაახლოებით 18 კილომეტრი გზის ასფალტირება,“ განაცხადა ალექსანდრე გრიგალავამ.

მარტვილის გამგებელი წყალმომარაგების სისტემების მოწესრიგების აუცილებლობაზეც საუბრობს და ამბობს, რომ რეგიონული განვითარებისა და ინფრასტრუქტურის სამინისტროს ფინანსური მხარდაჭერის გარეშე აღნიშნული საკითხის მოგვარება შეუძლებელი იქნება.

„წყალმომარაგების სისტემა თვითონ მარტვილში ნორმალურად ფუნქციონირებს და სასმელი წყალი 24 საათის განმავლობაში მიეწოდება მოსახლოებას, თუმცა პრობლემებია სოფლებში, განსაკუთრებით კი შედარებით მაღალმთიან ნაწილში, სადაც წყალმომარაგების სისტემების აწყობას 8 000 000 ლარი სჭირდება. ამ თემაზე ვაწარმოებთ მოლაპარაკებას რეგიონული განვითარებისა და ინფრასტრუქტურის სამინისტროსთან და ვიმედოვნებთ, რომ დადებითად გადაწყდება დაფინანსების საკითხი,“ აცხადებს გამგებელი.

ალექსანდრე გრიგალავა მარტვილში სპორტის განვითარების საკითხსაც შეეხო და აღნიშნა, რომ ამ მიმართულებით მუნიციპალიტეტში მილიონობით ლარის დახარჯვა იგეგმება.

„სულ ახლახან გავხსენით მარტვილის საფეხბურთო კლუბ „მერანის“ სტადიონი. მოგეხსენებათ მარტვილის „მერანი“ საქართველოს უმაღლეს ლიგაში თამაშობს, მაგრამ მიუხედავად ამისა, მას საკუთარ მოედანზე არ უთამაშია, რადგან სტადიონის საფარი უვარგისი იყო სათამაშოდ. სტადიონის აღსადგენად 621 000 ლარი დაიხარჯა. ფეხბურთის გარდა, ვცდილობთ ყურადღება მივაქციოთ სპორტის სხვა სახეობების შემდგომ განვითარებასაც. უნდა აღინიშნოს, რომ მომდევნო წლისთვის, შეიძლება ითქვას, გადაწყვეტილი გვაქვს სპორტული კომპლექსის მშენებლობა, რომლის დაფინანსება 10 600 000 ლარი ჯდება,“ ამბობს ალექსანდრე გრიგალავა და დასძენს, რომ „ყველა ის პროექტი, რომელიც მან ჩამოთვალა, „ქართული ოცნების“ ხელისუფლებაში მოსვლის შემდეგ განხორციელდა.

გამგებლის აზრით, ერთ-ერთი ყველაზე აქტუალური საკითხი, რაც მარტვილის ეკონომიკურ განვითარებასა და ინვესტიციების მოზიდვას შეეხება, დაკავშირებულია მუნიციპალიტეტის გაზმომარაგების პრობლემის გადაწყვეტასთან.

„გაზიფიცირების საკითხი კი შეიძლება ითქვას არც ისე სახარბიელოდ მიმდინარეობს. არადა ინვესტორი ინვესტიციიის ჩადებამდე სწორედ ელექტროენერგიის, სასმელი წყლის, გაზის თუ მისასვლელი გზის მდგომარეობას კითხულობს. სადაც ინფრასტრუქტურა არ არის გამართული, იქ ინვესტორიც თავს იკავებს ინვესტიციის ჩადებისაგან. ისე კი უნდა მოგახსენოთ, რომ ჩვენთან არსებობენ ადგილობრივი ბიზნესმენები, რომლებიც ხსნიან სხვადასხვა საწარმოებს. გარდა ამისა, გვყავს პოტენციური ინვესტორები. მაგალითად, ერთ-ერთი ინვესტორი მეუბნება, რომ თუ სოფელ სალხინოში ბუნებრივი აირის საკითხი გადაწყდება, მე 1 000 000 ლარის ინვესტიციას ჩავდებ ერთ-ერთ პროექტშიო, მაგრამ როგორც მოგახსენეთ, ჩვენთან გაზიფიცირების საკითხი მოგვარებას საჭიროებს,“ აცხადებს მარტვილის მუნიციპალიტეტის გამგებელი, ალექსანდრე გრიგალავა guardian.ge- სთან საუბრისას და იმედს იტოვებს, რომ აღნიშნული პრობლემა ეტაპობრივად გადაწყდება, რაც მარტვილის ეკონომიკის განვითარებას მნიშვნელოვან ბიძგს მისცემს.