საპარლამენტო უმცირესობის წევრმა, ნიკა მელიამ თბილისის ყოფილი მერი, საპატიმროდან ახალხანს გამოსული გიგი უგულავა გააკრიტიკა მას შემდეგ, რაც უგულავამ ე.წ. ბოკერი-უგულავას ფრთის მიერ „ნაციონალური მოძრაობის" დატოვების შესახებ პარტიის ცენტრალურ ოფისში საგანგებოდ გამართულ პრესკონფერენციაზე ყოფილ თანაპარტიელებზე ვრცლად ისაუბრა და მათ „ნული" უწოდა.

„ძალიან სამწუხაროა, რომ დღეს გვესაუბრებოდა ადამიანი, რომელიც დაიჭირა ივანიშვილმა, გამოუშვა ივანიშვილმა და გაბრაზებული იყო სააკაშვილზე. ბუნებრივია, ძალიან მიჭირს მე ამ ადამიანის მიმართ კომენტარების გაკეთება, ბევრი მიზეზისდა გამო, მაგრამ „ნაციონალური მოძრაობა" არ არის უბრალოდ პოლიტიკური გაერთიანება და პარტია და ამიტომ მე თავს შევიკავებდი ბევრი რამისგან. ვინაიდან, ძალაინ ბევრი რამ ხელისგულზე დევს და საზოგადოება ხედავს და საზოგადეობას აქვს ანალიზის უნარი და მე დარწმუნებული ვარ, რომ საზოგადოებამ დაინახა თუ რასთან გვაქვს საქმე. „ნაციონალური მოძრაობიდან" წასულა ბევრი პოლიტიკოსი, მათ შორის უფრო მძიმეწონოსანი პოლიტიკოსები, ვიდრე დღეს წავიდნენ, მაგრამ „ნაციონალური მოძრაობა" კი არ დასუსტებულა, პირიქით, გაძლიერებულა. და რატომ ხდება ყოველთვის ასე, რომ „ნაციონალური მოძრაობიდან" მიდიან, მაგრამ ის არ სუსტდება, პირიქით, ძლიერდება. რატომ იცით, მეგობრებო? ვინაიდან, „ნაციონალური მოძრაობა" არ არის პერსონების მოძრაობა, „ნაციონალური მოძრაობა" არის ეროვნული მოძრაობის გაგრძელება. „ნაციონალური მოძრაობა" არის ევროპული, თავისუფალი და წარმატებული საქართველოს იდეა. და ამ იდეას, ბუნებრივია, ვერ ერთი ცალკე აღებული პოლიტიკოსი ვერასოდეს ვერ დაამაცხებს, რაც არ უნდა ბევრი იყვნენ ისინი", - განაცხადა ჟურნალისტებთან საუბრისას ნიკა მელიამ.