ევროპის ქრისტიანულ-პოლიტიკური მოძრაობის ვიცე პრეზიდენტის, პაატა ბურჭულაძის ყოფილი თანამებრძოლის - „მოძრაობა სახელმწიფო ხალხისთვის" ყოფილი აქტიური სახის გიორგი რუხაძის შეფასებით, საქართველომ „გაზპრომთან" მოლაპარაკებებში დათმო თავისი პოზიციები, რითაც მისივე აზრით, რეგიონისა და დასავლეთის ქვეყნებს „ძალიან ცუდი პოლიტიკური სიგნალი" გაუგზავნა.    

„გაზპრომმა" შამათი გაუკეთა საქართველოს ენერგეტიკის სამინისტროს და საქართველომ დათმო პოზიციები, რითაც ძალიან ცუდი პოლიტიკური სიგნალი გააგზავნა, როგორც რეგიონის ქვეყნებში, ასევე დასავლეთში, რომ ამ ქვეყანას არ შეუძლია საკუთარი ინტერესების დაცვა იმ შემთხვევაშიც კი, როდესაც ის უპირატეს მდგომარეობაში იმყოფება მოლაპარაკებებში,“ -განაცხადა ევროპის ქრისტიანულ-პოლიტიკური მოძრაობის ვიცე პრეზიდენტმა, გიორგი რუხაძემ „რუსთავი 2"-თან საუბრისას.    

ქართულ მხარესა და კომპანია „გაზპრომ-ექსპორტის” ხელმძღვანელობას შორის შეხვედრა მინსკში 10 იანვარს გაიმართა. შეხვედრიდან დაბრუნებულმა საქართველოს ენერგეტიკის მინისტრმა, კახა კალაძემ განაცხადა, რომ ქართული მხარე რუსეთიდან სომხეთში გაზის ტრანზიტის საფასურის გადახდის ფორმასთან დაკავშირებით „გაზპრომ ექსპორტის“ მოთხოვნას დათანხმდა.    

მინისტრის განმარტებით, გადახდის ფორმის ცვლილება ნედლეულით ანაზღაურების ნაცვლად, საერთაშორისო პრაქტიკის შესაბამისად, ფულად ანაზღაურებაზე გადასვლას გულისხმობს.    

კალაძის თქმით, „გაზპრომ ექსპორტის“ საბოლოო წინადადება მთავრობის სხდომაზე განიხილეს და ხელშეკრულების ახალი პირობების შესაბამისად გაფორმების გადაწყვეტილება მიიღეს.