საქართველოს ყოფილ პრეზიდენტთან, მიხეილ სააკაშვილთან „ერთიანი ნაციონალური მოძრაობის“ წევრების კიევში გამართული შეხვედრის შემდეგ, პარტიის ე.წ. სააკაშვილის დაჯგუფების წარმომადგენელი აკაკი მინაშვილი აცხადებს, რომ უკრაინის დედაქალაქში საუბარი ძირითადად 20 იანვრის ყრილობის მზადებას და „ნაციონალური მოძრაობის“ სამომავლო გეგმებს შეეხო, რომლის მთავარი ნაწილი, მინაშვილის თქმით, ივანიშვილის წინააღმდეგ ბრძოლა იქნება.

„საუბარი იყო, როგორც 20 იანვრის ყრილობის მზადებაზე, ასევე „ნაციონალური მოძრაობის“ სამომავლო, განახლებულ გეგმებზე - რა მექანიზმებით, რა ბერკეტებით, რა რესურსებით გვექნება ბრძოლა ივანიშვილის წინააღმდეგ, იმიტომ, რომ ივანიშვილი არის სათავე და საფუძველი იმ ძალიან სერიოზული პრობლემების, ძალიან სერიოზული უბედურების, რაც ქვეყანაში არსებობს, მათ შორის ეკონომიკური, მათ შორის უსაფრთხოების კუთხით, მათ შორის კრიმინალის კუთხით. ამას სჭირდება ძალიან სწრაფი, ძალიან ეფექტური ბრძოლა და ამაზე იყო ბუნებრივია, საუბარი კიევში. ეს ინფორმაცია საზოგადოებას ექნება და ყრილობა არის ამის, ასე ვთქვათ, მთავარი საფუძველი“, - განაცხადა აკაკი მინაშვილმა „რუსთავი 2“ - თან საუბრისას.