„ერთიანი ნაციონალური მოძრაობის“ ე.წ. სააკაშვილის ფრთა - მას შემდეგ, რაც გიგა ბოკერიას დაჯგუფებამ „ნაციონალური მოძრაობის“ გაყოფის გამოცხადებიდან მეორე დღესვე, უმაღლეს საკანონმდებლო ორგანოში არსებულ ფრაქციას - „ერთიან ნაციონალურ მოძრაობას“ სახელი გადაარქვა და მისი თავმჯდომარეობიდან ნიკა მელიაც გადააყენა - ყოფილ თანაგუნდელებთან პარლამენტში პოლიტიკურ ბრძოლას იწყებს, რომლის მიზანიც იქნება ის, რომ „ერთიან ნაციონალურ მოძრაობას“ ჰყავდეს თავისი ფრაქცია და ამისათვის, თინათინ ბოკუჩავას თქმით, ისინი ყველანაირ ბერკეტს გამოიყენებენ.

„12 იანვარს, ბოკერიას გუნდმა გააკეთა განცხადება „ერთიანი ნაციონალური მოძრაობის“ დატოვების და ახალი პოლიტიკური პარტიის შექმნასთან დაკავშირებით. სამწუხაროდ, მათი თავიანთი პირველი პოლიტიკური გამოსვლა სწორედ „ერთიანი ნაციონალური მოძრაობის“ ლანძღვა-გინებას დაუთმეს. ახლა კი, იგივე ადამიანები აცხადებენ, რომ არ ტოვებენ „ერთიანი ნაციონალური მოძრაობის“ ფრაქციას პარლამენტში. 13 იანვარს მათ ჩაატარეს ფრაქციის სხდომა, სადაც გადაირჩიეს თავმჯდომარე, ნიკა მელია, ასევე შეიტანეს ცვლილება წესდებაში და შეუცვალეს სახელი ფრაქციას. ასევე, შესაბამის სამსახურებს პარლამენტში ისინი უცხადებენ, რომ ისინი არ ტოვებენ „ერთიანი ნაციონალური მოძრაობის“ ფრაქციას. ამგვარი, ორმაგი თამაში და პროცედურული ხრიკები არის მცდელობა მათი მხრიდან, რომ ერთის მხრივ, დააბნიონ ამომრჩეველი და ასევე, ამ დამატებითი ფრაქციის შენარჩუნებით, შეინარჩუნონ დამატებითი თანამდებობები და შესაბამისი სარგებელი და სიკეთეები... ჩვენ ყველა ბერკეტს გამოვიყენებთ იმისთვის, რომ პარლამენტში „ერთიან ნაციონალურ მოძრაობას“ ჰყავდეს თავისი ფრაქცია, რომ ჩვენი ამომრჩევლის ინტერესებს წარმოადგენდნენ ის ადამიანები, რომლებიც დარჩნენ ერთგული იმ ღირებულებების, რომელზეც ეს მოძრაობა დგას“, - განაცხადა თინათინ ბოკუჩავამ დღეს გამართულ პრეს-კონფერენციაზე.