„ევროპული საქართველო“ აცხადებს, რომ „ერთიან ნაციონალურ მოძრაობას“ საპარლამენტო ფრაქციის შექმნაში ხელს არ უშლის და გამოხატავს მზადყოფნას აღნიშნულ საკითხთან დაკავშირებულ იურიდიულ დეტალებზე ყოფილ თანაგუნდელებს წარმომადგენლებთან, „საჯარო სივრცეში აზრთა სხვადასხვაობის გადმოტანის გარეშე“ ტექნიკურ კონსულტაციები გაუწიოს.

„ფრაქცია „ევროპული საქართველო“ არ უშლის ხელს ენმ-ს ფრაქციის შექმნაში. ამ საკითხთან დაკავშირებით არსებობს იურიდიული დეტალები, რომლებიც შეიძლება ერთი შეხედვით გაუგებარი იყოს ჩაუხედავი პირისთვის, თუმცა ჩვენ მზად ვართ ამ თემასთან დაკავშირებით ტექნიკური კონსულტაციები გავუწიოთ ენმ-ის წარმომადგენლებს პარლამენტში, რათა მათ შეძლონ ფრაქციის შექმნა და ნორმალური ფუნქციონირება. ჩვენი ამოცანა ნამდვილად არ არის ენმ-ისთვის პარლამენტის ფარგლებში საქმიანობისთვის ხელის შეშლა. ამ მიზნით ჩვენ მზად ვართ ორმხრივ რეჟიმში გვქონდეს ურთიერთობები ენმ-ის წარმომადგენლებთან, საჯარო სივრცეში აზრთა სხვადასხვაობის გადმოტანის გარეშე. ჩვენი განცხადება პარტიის გაყოფის დღეს სწორედ იმისკენ იყო მიმართული, რომ ჩვენს შორის მოხდეს ტექნიკური და იურიდიული საკითხების დარეგულირება და თანამშრომლობა ამგვარ დეტალებზე ცივილიზებული ჩარჩოების ფარგლებში. სწორედ ამიტომ შესთავაზა სერგო რატიანმა ენმ-ს თანამდებობაზე დარჩენა და იურიდიული საკითხების მოგვარება და სწორედ ამიტომ იქნა დროულად გადარიცხული თანხა სპორტის სასახლისთვის, რათა ხელი არ შეშლოდა 20 იანვრის „ყრილობის“ ჩატარებას. კარგი იქნება, თუ ენმ-ის წარმომადგენლები დღეიდან, ნაცვლად ჩვენთან დაპირისპირების გაგრძელებისა, ფოკუსირდებიან „ქართული ოცნების“ ოპონირებაზე და ძალისხმევას არ დაიშურებს ბიძინა ივანიშვილის რეჟიმის წინააღმდეგ საბრძოლველად“, - ნათქვამია „ევროპული საქართველოს“ მიერ გავრცელებულ განცხადებაში.

„ერთიანი ნაციონალური მოძრაობის“ ე.წ. სააკაშვილის ფრთა - მას შემდეგ, რაც გიგა ბოკერიას დაჯგუფებამ „ნაციონალური მოძრაობის“ გაყოფის გამოცხადებიდან მეორე დღესვე, უმაღლეს საკანონმდებლო ორგანოში არსებულ ფრაქციას - „ერთიან ნაციონალურ მოძრაობას“ სახელი გადაარქვა და მისი თავმჯდომარეობიდან ნიკა მელიაც გადააყენა - ყოფილ თანაგუნდელებთან პარლამენტში პოლიტიკურ ბრძოლას იწყებს, რომლის მიზანიც იქნება ის, რომ „ერთიან ნაციონალურ მოძრაობას“ ჰყავდეს თავისი ფრაქცია და ამისათვის, თინათინ ბოკუჩავას თქმით, ისინი ყველანაირ ბერკეტს გამოიყენებენ.