მე ვიცი, რომ გიგი უგულავა ძირითადად, ჩემ გამო დასაჯეს, ისევე როგორც სხვა პოლიტპატიმრები ჩემ გამო დასაჯეს, - აღნიშნული განცხადება საქართველოს ყოფილმა პრეზიდენტმა, მიხეილ სააკაშვილმა „რუსთავი 2"-ის გადაცემაში „არჩევანი" გააკეთა.

სააკაშვილი მიიჩნევს, რომ აღნიშნული არ ნიშნავს, რომ უგულავა მასზე უფრო მეტად უნდა იყოს გაბრაზებული, ვიდრე „უსამართლოდ დამსჯელზე".

„ხელში რომ გიჭირავს და ხელს რომ გაუშვებ, მერე ყველაფერი მოსულა. ეს არის ჩემი გამოცდილება წარსულში, ოქრუაშვილზეც, ბურჯანაძეზეც და სხვებზეც. ოქრუაშვილი რევოლუციის ერთ-ერთი ლიდერი იყო, მაგრამ თვალსა და ხელს შუა მოხდა მისი დეგრადაცია. ადამიანები იცვლებიან. ადამიანი შეიძლება ძალიან რთულ სიტუაციაში იყოს ძალიან მაგარი და შემდეგ, ბევრად უფრო მარტივ სიტუაციაში გაფუჭდეს. ეს ხდება. ეს ჩვეულებრივი ადამიანური სისუსტეებია. რაც შეეხება გიგის, მართლა ადამიანურად მიხარია, რომ ის არის გარეთ. ახალგაზრდა ადამიანი, ჯან-ღონით აღსავსე რამდენიმე წლით გაამწესეს საპატიმროში მხოლოდ იმისთვის, რომ რაც შეძლო და როგორც შეეძლო თავისი უნარების ფარგლებში მე მეხმარებოდა ამ რთული უბნის თბილისის განვითარებაში. მე ამისთვის მადლობელი ვარ მისი, მიმაჩნია უკიდურეს უსამართლობად მისი დასჯა ამისთვის. მე ისიც ვიცი, რომ ის ძირითადად, ჩემ გამო დასაჯეს ისევე, როგორც სხვა პოლიტპატიმრები ჩემ გამო დასაჯეს. ივანიშვილის მთავარი პრობლემა ვარ მე. მე ვიცი, რომ ჩემ გამო დაისაჯა ეს ხალხი, ეს ასეა.... ის, რომ ჩემ გამო დაისაჯე, არ არის საკმარისი მიზეზი, რომ ჩემზე უფრო გაბრაზდე, ვიდრე უსამართლოდ დამსჯელზე. მესმის ფსიქოლოგია, როცა ვიღაცის გამო ისჯები, მტკივნეულია, მაგრამ ჩემ გამოც არ იყო, იდეის გამო იყო, ჩვენ ყველანი ვემსახურებოდით ამ იდეას“ - განაცხადა მიხეილ სააკაშვილმა.