„ახალგაზრდა იურისტთა ასოციაცია“ საქართველოს ენერგეტიკის სამინისტროსგან „გაზპრომის“ მიერ სომხეთში საქართველოს გავლით გაზის ტრანზიტთან დაკავშირებული გარკვეული ინფორმაციის გაცემას მოითხოვს.

საია-ს პროექტის კოორდინატორმა, სულხან სალაძემ განცხადებით ენერგეტიკის სამინისტროს დღეს მიმართა.

სალაძის განმარტებით, საია უწყებისგან შემდეგი ინფორმაციის გაცემას მოითხოვს:

1. საქართველოს გავლით სომხეთში რუსული გაზის ტრანზიტის სანაცვლოდ „გაზპრომთან“ გაფორმებული იმ ხელშეკრულების ასლი, რომლის მოქმედების ვადაც 2016 წლის 31 დეკემბერს ამოიწურა;

2. 2017 წლის 1-ლი იანვრიდან საქართველოს გავლით სომხეთში რუსული გაზის ტრანზიტის სანაცვლოდ ახალი ხელშკრულების გაფორმების მიზნით „გაზპრომთან“ წარმოებული მოლაპარაკების ამსახველი ყველა ოფიციალური დოკუმენტის ასლი;

3. 2017 წლის 1-ლი იანვრიდან საქართველოს გავლით სომხეთში რუსული გაზის ტრანზიტის სანაცვლოდ გასაფორმებელი ახალი ხელშეკრულების თაობაზე „გაზპორმთან“ მიღწეული შეთანხმების ასლი.

როგორც სულხან სალაძემ აღნიშნა, ენერგეტიკის სამინისტრომ საია-ს განცხადებაზე პასუხი უნდა გასცეს განცხადების წარდგენიდან მაქსიმუმ 10 სამუშაო დღის ვადაში.

საია-ს გარდა, „გაზპრომთან" დაკავშირებული მოლაპარაკების დეტალების გასაჯაროებას, კიდევ 80 არასამთავრობო ორგანიზაცია ითხოვს.