რუსეთის და თურქეთის სამხედრო თვითმფრინავებმა თავიანთი პირველი ერთობლივი ავიადარტყმები განახორციელეს ე.წ. ისლამურ სახელმწიფოზე სირიის შიგნით. ინფორმაციას ბრიტანული სამაუწყებლო კორპორაცია (BBC) რუსეთის თავდაცვის სამინისტროზე დაყრდნობით ავრცელებს.

„ისლამური სახელმწიფო“ სამიზნე იყო ქალაქ ალ-ბაბის გარეუბნებში, ასევე ალეპოს პროვინციაში, სადაც თურქეთმა სახმელეთო ბრძოლებში მძიმე დანაკლისი განიცადა გასულ თვეს.

„როიტერსი“, რომელიც თურქეთის სამხედროების ციტირებას ახდენს, წერს, რომ რუსეთმა განახორციელა საჰაერო დარტყმები „თურქეთთან კოორდინირებით“.

რუსეთი და თურქეთი სირიის სამოქალაქო ომში წამყვანი გარე მოთამაშეები არიან.

ალ-ბაბი, რომელიც თურქეთის საზღვრიდან დაახლოებით 20 კილომეტრში მდებარეობს, თურქეთის მთავარი სამიზნეა ბოლო 5 თვის განმავლობაში. თურქული სამხედრო კამპანიის მიზანია განდევნოს ტერიტორიიდან როგორც „ისლამური სახელმწიფო“, ისე ქურთული ძალები.

ამ ფონზე BBC სვამს რიტორიკულ შეკითხვას - რუსეთი და თურქეთი საჰაერო სივრცეში ერთმანეთს თავად არ ებრძოდნენ ერთი წლის წინათ? - რასაც თავადვე პასუხობს - დიახ, თურქეთის ავიაგამანადგურებელმა რუსული „სუ-24“ -ის ტიპის ბომბდმაშენი 2015 წლის 24 ნოემბერს სირიის საზღვართან ჩამოაგდო, რომლის დროსაც ეკიპაჟის ერთი წევრი დაიღუპა, მეორის გადარჩენა კი მოხერხდა.

ეს შეჯახება რუსეთსა და ნატო-ს წევრ ქვეყანას შორის კრიზისის გამომწვევის მიზეზი გახდა. მოსკოვმა ანკარას ეკონომიკური სანქციები დაუწესა, რამაც თურქეთის ეკონომიკა დააზარალა.

ეს კი მხოლოს მას შემდეგ დასრულდა, რაც თურქეთის პრეზიდენტმა რეჯეფ თაიფ ერდოღანმა საჯაროდ გამოხატა სინანული მომხადრის გამო და პრეზიდენტ ვლადიმერ პუტინს ბოდიშის წერილი გაუგზავნა, მოგვიანებით კი რუსეთში ჩავიდა ოფიციალურ ვიზიტად და პუტინს „თავისი მეგობარი“ უწოდა.

მას შემდეგ, ორმა ქვეყანამ არა მხოლოდ გააღრმავა ეკონომიკური კავშირები, არამედ კოორდინირებულად თანამშრონლობენ ერთად სირიაში, რათა ცეცხლის შეწყვეტის საბოლოო წერტილამდე მივიდნენ.

ისინი, ირანთან ერთად, ორშაბათს სამშვიდობო მოლაპარაკებების ორგანიზებას ახდენენ ყაზახეთის დედაქალაქ ასტანაში.