სპორტისა და ახალგაზრდობის საქმეთა მინისტრი ტარიელ ხეჩიკაშვილი ლისის ტბის მახლობლად მდებარე თბილისის SOS ბავშვთა სოფელს ესტუმრა. მინისტრმა სოფელში მცხოვრებ ახალგაზრდებს ნათლისღების დღესასწაული მიულოცა და მათ სხვადასხვა სპორტული ინვენტარი - ფორმები, ბურთები, მაისურები, ჟურნალები, ასევე მაგიდის ჩოგბურთის ახალი მაგიდა გადასცა.

სპორტისა და ახალგაზრდობის საქმეთა სამინისტროს ცნობით, უწყება თბილისის SOS ბავშვთა სოფელთან რამდენიმე წელია აქტიურად თანამშრომლობს.

მემორანდუმის თანახმად, სამინისტრო ბავშვთა სოფლის ახალგაზრდების სპორტით დაინტერესებასა და მათ სპორტში ჩართულობაზე ზრუნავს.

სამინისტროს განმარტებით, დღეისთვის, ბავშვთა სოფლის ბენეფიციარებისათვის 4 სხვადასხვა სპორტული წრე ფუნქციონირებს. ფეხბურთის, რაგბის, ფარიკაობისა და ჭიდაობის სექციებში ჯამში 30-მდე ბავშვია ჩართული, სოფელში 57 ახალგაზრდა ცხოვრობს.

„მსურს მოგილოცოთ დღევანდელი ნათლისღების ბრწყინვალე დღესასწაული და ყველაფერი საუკეთესო გისურვოთ. აქ, თქვენთან ნამდვილად საუკეთესო გარემო და პირობებია შექმნილი და დარწმუნებული ვარ, ყველას ვინც მობრძანდება, განსაკუთრებული შთაბეჭდილებები დაეუფლება. ნამდვილად დიდი სითბო და სიყვარული იგრძნობა მომსახურე პერსონალის მხრიდან, რისთვისაც დიდი მადლობა მათ. ისინი დღენიადაგ ზრუნავენ იმისათვის, რომ აქ მცხოვრებ ახალგაზრდებს საუკეთესო პირობები ჰქონდეთ და ამ მხრივ ჩვენ სრულ მხარდაჭერას ვპირდებით. სამინისტროს ჩართულობით, ჩვენ მაქსიმლუარად შევუწყობთ ხელს ახალგაზრდებს, რათა ისინი სპორტით დაინტერესდნენ და სხვადასხვა სპორტული სახეობებით დაკავდნენ. სპორტი საქართველოში ყველა სეგმენტისათვის ხელმისაწვდომი უნდა იყოს და რა თქმა უნდა, ამ ბავშვებსაც აქვთ საშუალება იმისა, რომ წარმატებულები იყვნენ სპორტში. დღეს ჩვენ მცირეოდენი საჩუქრებით მოვედით, დავარიგეთ სპორტული ინვენტარი, ბურთები, მაისურები, ჟურნალები. ჩვენი მეგობრობა სამომავლოდ აუცილებლად გაგრძელდება და თითოეულ მათგანს დავეხმარებით, იმისათის რომ კიდევ უფრო მეტად დაკავდნენ სპორტით და იყვნენ წარმატებულები სპორტის სხვადასხვა სახეობებში", - განაცხადა ტარიელ ხეჩიკაშვილმა.