საქართველო სამაგალითო წარმატების ქვეყანაა, რომელიც ლიდერია რეგიონში ლიცენზირებული პროგრამების მოხმარების, ინოვაციების განვითარებისა და ინტელექტუალური საკუთრების დაცვის კუთხით, - განაცხადა მულტინაციონალური კომპიუტერული ტექნოლოგიების კორპორაცია Microsoft-ის ვიცე პრეზიდენტმა, ტონი თაუნს ვითლიმ საქართველოს პრემიერ მინისტრთან, გიორგი კვირიკაშვილთან შეხვედრისას.

მისივე თქმით, Microsoft-ი განიხილავს საქართველოსთან თანამშრომლობის გაღრმავებას სხვადასხვა მიმართულებით.

მთავრობის ადმინისტრაციის ცნობით, გიორგი კვირიკაშვილმა Microsoft-ის ვიცე პრეზიდენტს მთავრობის რეფორმების 4-პუნქტიანი გეგმა გააცნო, რომლის ერთ-ერთი ძირითადი ნაწილი “სტარტაპების” ხელშეწყობა და ბიზნესის განვითარებაში თანამედროვე ტექნოლოგიებისა და ინოვაციების გამოყენებაა.

საქართველოს მთავრობის მეთაურის განცხადებით, ამ მიმართულებით Microsoft-ის თანამშრომლობა საქართველოს ინოვაციების და ტექნოლოგიების სააგენტოსთან არის უაღრესად მნიშვნელოვანი.

პრემიერ მინისტრმა მადლობა გადაუხადა კომპანია Microsoft-ს განათლებისა და ინოვაციების სფეროში მხარდაჭერისთვის და ურთიერთობების გაღრმავების იმედი გამოთქვა.