ქელეხს გვიმზადებდნენ და დაბადების დღე გამოუვიდათ - ეს იმიტომ, რომ სიმართლე არის ჩვენს მხარეზე, - აღნიშნული განცხადება საქართველოს საგარეო საქმეთა ყოფილმა მინისტრმა, გრიგოლ ვაშაძემ სპორტის სასახლეში, „ერთიანი ნაციონალური მოძრაობის" ყრილობაზე სიტყვით გამოსვლისას გააკეთა.

მისი თქმით, აუცილებელია, რომ პარტიამ ყველა რეგიონში ყველა კარი შეაღოს და მოქალაქეებს უთხრას, რომ მათი გასაჭირის შესახებ იცის.

„თქვენ მიშასთან ერთად გადააქციეთ კორუფციით და კრიმინალით განადგურებული ქვეყანა თანამედროვე სახელმწიფოდ. თქვენ დაწესებულ დროშას სწევენ დღეს; თქვენ შემოღებულ ჰიმნს მღერიან; თქვენ დატოვებულ ბიუჯეტს ხარჯავენ; თქვენ ინსტიტუციებში სხედან; თქვენი შექმნილი პოლიცია იცავთ; მაგრამ ეს ყველაფერი წარსული არის უკვე და ამით თავი არ უნდა დავიმშვიდოთ. ჩვენ საქართველოს მოქალაქეებისთვის მეტი უნდა გაგვეკეთებინა და შეგვეძლო და დღეს ფიზიკური გადარჩენის ზღვარზე მყოფ ადამიანებს უნდა ვუთხრათ, რომ ჩვენ მათი ტკივილი გვესმის. სალონური თამაშები უნდა მოვრჩეთ და ყველა რეგიონში ყველა კარი უნდა შევაღოთ და ვუთხრათ, რომ ვიცით, რომ უჭირთ, მართლა უჭირთ. ვიცით, რომ მობეზრდათ ამ ადამიანებს ვითომ ოქსფორდში და ვითომ ჰარვარდში ნასწავლი ვითომ ციტატებით შეჯერებული ყალბი დაპირებები", - მიმართა ვაშაძემ ყრილობის მონაწილეებს.