დონალდ ტრამპი ამერიკის შეერთებული შტატების 45-ე პრეზიდენტი გახდა, მას შემდეგ რაც ცოტა ხნის წინათ ფიცი დადო. მანამდე ფიცი ვიცე-პრეზიდენტმა მაიკ პენსმა დადო.

ტრამპმა საინაუგურაციო სიტყვა წარმოთქვა და აღნიშნა, რომ ამერიკის შეერთებულ შტატებს ისევ დიდებულ ქვეყნად აქცევს - დააბრუნებს სამუშაო ადგილებს, აამუშავებს ქარხნებს, ააშენებს გზებს და რკინიგზებს.

„ჩვენ ავაშენებთ ახალ გზებს და ავტომაგისტრალებს, ხიდებს, აეროპორტებს, გვირაბებს, რკინიგზებს მთელი ჩვენი ჩინებული ქვეყნის მასშტაბით. ჩვენ დავაბრუნებთ ჩვენს ხალხს სამუშაოზე, ხელახლა ავაშენებთ ჩვენს ქვეყანას ამერიკული ხელებით და ამერიკული მუშა-ხელით.

ჩვენ ორ მარტივ წესს გავყვებით; იყიდე ამერიკული და დაასაქმე ამერიკელი.

„ჩვენ მეგობრობის ხელს გავუწვდით მსოფლიოს სახელმწიფოებს და კეთილმოსურნე ვიქნებით მათთვის, მაგრამ ჩვენ ამას გავაკეთებთ იმის გაცნობიერებით, რომ ყველა სახელმწიფოს უფლებაა პირველ რიგში თავიანთი საკუთარი ინტერესები დააყენონ. ჩვენ არ ვეცდებით დავუწესოთ ვინმეს ჩვენი ცხოვრების წესი, მაგრამ ამის ნაცვლად შევქმნით გარანტიას, რომ მან [ამერიკამ] იბრწყინოს როგორც მაგალითმა. ჩვენ ვიბრწყინებთ ყველასათვის, რომ გამოგვყვნენ.

ჩვენ გავაძლიერებთ ძველ ალიანსებს და ჩამოვაყალიბებთ ახლებს და გავაერთიანებთ ცივილიზებულ მსოფლიოს რადიკალური ისლამური ტერორიზმის წინააღმდეგ, რომელიც ამოიძირკვება მიწისაგან პირისა“, - განაცხადა ტრამპმა. 

3-5 საათებში (20:00 - 22:00 GMT) ტრამპი და პენსი გადაინაცვლებენ პენსილვანიის ავენიუსკენ 2.4 კილომეტრიან სამხედრო აღლუმში, რომლის გაყოლებაზეც მოელიან, რომ ჩამწკრივებული იქნებიან როგორც მხარდამჭერები, ასევე პროტესტანტები.

7-11საათებში (00:00-04:00 GMT) ტრამპი და პენსი მეუღლეებთან ერთად დაესწრებიან სამ ოფიციალურ საინაუგურაციო წვეულებას.

ასეულობით ათასი ადამიანია გამოსული ვაშინგტონში არჩეული პრეზიდენტის ინაუგურაციაზე დასასწრებად. საპატიო სტუმრებს შორის არიან ბილ კლინტონი და ჰილარი კლინტონი, ჯორჯ დაბლიუ ბუში და მისი მეუღლე ლორა, ასევე ყოფილი პრეზიდენტი ჯიმი კარტერი.

ჯორჯ ეიჩ დაბლიუ ბუშმა, რომელიც სუნთქვითი პრობლემების გამო საავადმყოფოში იმყოფებოდა, ტრამპს წერილი მისწერა, წარმატებები უსურვა მას და ბოდიში მოიხადა, რომ ჯანმრთელობის პრობლემების გამო ღონისძიებას ვერ დაესწრებოდა. 

ყველა თვალი შეერთებული შტატების კონგრესის შენობისკენაა მიმართული, სადაც ტრადიციულად, ამერიკის პრეზიდენტების ინაუგურაცია იმართება. ამჯერად, „რესპუბლიკელმა“ დონალდ ტრამპმა, რომელმაც 2016 წლის 8 ნოემბრის საპრეზიდენტო არჩევნებში მის მოწინააღმდეგე ჰილარი კლინტონზე საარჩევნო კოლეგიაში ხმების დიდი უპირატესობით გაიმარჯვა, „დემოკრატი“ ბარაქ ობამა შეცვალა პრეზიდენტის პოსტზე.

კონსტიტუციის თანახმად, შეერთებული შტატების ახლად არჩეული პრეზიდენტი ფიცს ყოველ ოთხ წელიწადში ერთხელ, 20 იანვარს შუადღეს, 12:00 საათზე (17:00 GMT) დებს.

მომავალი პრეზიდენტის ინაუგურაცია ისტორიულად 4 მარტს ხდებოდა, მაგრამ არჩეული პრეზიდენტის თეთრ სახლში გადასვლის პერიოდი, მე-20 ცვლილების საფუძველზე, 1933 წელს შემოკლდა.

ფიცის დადება, შეერთებული შტატების კონგრესის შენობის წინ კიბეებზე, ცერემონიის ნაწილია, რაც ძალაუფლების მშვიდობიან გადაცემას აღნიშნავს.